Krishtianu Ronaldu “An-Nasr”ning navbatdagi uchrashuvlarida qatnashmaydi.

Dekabr oyi oxirida Saudiya klubi bilan shartnoma imzolagan hujumchi "Al-Tai" va "Ash-SHabab" jamoalariga qarshi o‘yinlarni o‘tkazib yuboradi. Uchrashuvlar 5 va 14 yanvar kunlari bo‘lib o‘tadi.

Portugaliyalik futbolchi diskvalifikasiya tufayli ushbu uchrashuvlarda maydonga tusha olmaydi. Noyabr oyida Angliya futbol assosiasiyasi uni aprel oyida sodir bo‘lgan voqea uchun 2 o‘yinga diskvalifikasiya qilgandi. O‘shanda "Manchester Yunayted"da o‘ynagan futbolchi bemor bolaning telefonini sindirib tashladi.

Ronaldu diskvalifikasiyani hali bajarmagan, bu boradagi qaror uning "Manchester Yunayted" bilan shartnomasi bekor qilingan kunning ertasiga qabul qilingan. FIFA reglamentiga ko‘ra, avvalgi ligalarda diskvalifikasiya muddatini oxirigacha o‘tkazmagan futbolchilar yangi chempionatdagi dastlabki o‘yinlarni o‘tkazib yuborishlari shart.

Shu tariqa, Ronaldu 21 yanvargacha “Al-Nasr”da o‘ynay olmaydi. Keyin esa jamoa “Al-Ittifoq” bilan uchrashadi.