Namanganning "Navbahor" klubi matbuot xizmatining xabar berishicha, ertaga Samvel Babayan boshchiligidagi "lochinlar" Turkiyaga yo‘l oladi.
"Yangi mavsumda o‘z oldiga yuksak maqsadlarni qo‘ygan vise-chempion, Osiyo Chempionlar Ligasi (OCHL) "pley-off" bahslarini muvaffaqiyatli yakunlab, guruh bosqichi yo‘llanmasini qo‘lga kiritishni rejalashtirgan jamoamiz 2023 yilgi mavsumga tayyorgarlikni ham jiddiy tarzda olib borishni niyat qilgan.
“Lochinlar” yangi yildagi ilk o‘quv-mashg‘ulot yig‘inini o‘tkazish maqsadida, ertaga ertalab Toshkent – Antalya aviayo‘nalishi bo‘yicha Turkiyaga parvoz qilishadi. Turkiyadagi yig‘in davomida jamoamiz xorij klublariga qarshi bir qator nazorat-sinov uchrashuvlari o‘tkazishni rejalashtirgan" - deyiladi klub matbuot xizmatining xabarida.
