Superligaga tayyorgarlik ko‘rayotgan “Andijon” jamoasining mashg‘ulotlari Dukent shaharchasi, “Yangiobod” o‘quv-sport mashg‘ulot bazasidagi tayyorgarlik yig‘ini davom etmoqda.

"Jamoamiz joylashgan qarorgohda hamma sharoitlar muhayyo bo‘lib, barcha e’tibor faqat mashg‘ulotlarga qaratilgan.

Ma’lumot uchun shuni ham qo‘shimcha qilib o‘tishimiz kerakki, bu yerda qilichbozlar, og‘ir atletikachi, bokschilardan iborat O‘zbekiston terma jamoasi vakillari ham o‘z yig‘inlarini o‘tkazishadi. Shundan ham bilish mumkinki, sharoitlar va shug‘ullanish uchun mo‘ljallangan sport inshootlari a’lo darajada.

Jamoamiz kuniga ikki mahaldan mashg‘ulotlar o‘tkazyapti. Bugun kunning birinchi yarmida bosh murabbiy futbolchilarni yopiq manejda turli xil qiziqarli mashqlar yordamida shug‘ullantirdi. Kechki paytdagi mashg‘ulot esa stadion hududida bo‘lib o‘tdi.

Muxlislarimizni tarkibga yangi qo‘shilayotgan futbolchilar qiziqtirishi shubhasiz. Shu bois tarkibga jalb etilayotgan futbolchilar borasida ma’lumotlar berib bormoqdamiz. Bu safar ular uchun yangilik sifatida shuni ma’lum qila olamizki, bugun jamoamiz safiga iqtidorli hujumchi Bobur Farhodov qo‘shildi. 27 yoshli futbolchi 2022 yilgi chempionatda “So‘g‘diyona” hamda “Metallurg” klublarida to‘p surgan.

Bundan tashqari, o‘tgan yilgi mavsum bo‘yicha jamoamizning eng yaxshi futbolchisi sifatida e’tirof etilgan Ildar Mamatkazin ham bugun klub ixtiyoriga yetib keldi" - deyiladi andijonliklarning matbuot xizmati bergan xabarda.