Суперлигага тайёргарлик кўраётган “Андижон” жамоасининг машғулотлари Дукент шаҳарчаси, “Янгиобод” ўқув-спорт машғулот базасидаги тайёргарлик йиғини давом этмоқда.
"Жамоамиз жойлашган қароргоҳда ҳамма шароитлар муҳайё бўлиб, барча эътибор фақат машғулотларга қаратилган.
Маълумот учун шуни ҳам қўшимча қилиб ўтишимиз керакки, бу ерда қиличбозлар, оғир атлетикачи, боксчилардан иборат Ўзбекистон терма жамоаси вакиллари ҳам ўз йиғинларини ўтказишади. Шундан ҳам билиш мумкинки, шароитлар ва шуғулланиш учун мўлжалланган спорт иншоотлари аъло даражада.
Жамоамиз кунига икки маҳалдан машғулотлар ўтказяпти. Бугун куннинг биринчи ярмида бош мураббий футболчиларни ёпиқ манежда турли хил қизиқарли машқлар ёрдамида шуғуллантирди. Кечки пайтдаги машғулот эса стадион ҳудудида бўлиб ўтди.
Мухлисларимизни таркибга янги қўшилаётган футболчилар қизиқтириши шубҳасиз. Шу боис таркибга жалб этилаётган футболчилар борасида маълумотлар бериб бормоқдамиз. Бу сафар улар учун янгилик сифатида шуни маълум қила оламизки, бугун жамоамиз сафига иқтидорли ҳужумчи Бобур Фарҳодов қўшилди. 27 ёшли футболчи 2022 йилги чемпионатда “Сўғдиёна” ҳамда “Металлург” клубларида тўп сурган.
Бундан ташқари, ўтган йилги мавсум бўйича жамоамизнинг энг яхши футболчиси сифатида эътироф этилган Илдар Маматказин ҳам бугун клуб ихтиёрига етиб келди" - дейилади андижонликларнинг матбуот хизмати берган хабарда.
