Yangi yil munosabati bilan bayram ta’tiliga chiqqan Bekobodning “Metallurg” jamoasi kelayotgan haftaning ilk kunidan navbatdagi o‘quv-mashg‘ulot yig‘inini boshlaydi.
"Ikkinchi yig‘in ham jamoaning Bekobod shahridagi qarorgohida hamda “Metallurg” stadionida olib borilishi rejalashtirilgan.
Dushanba kuni klub ixtiyoriga ispaniyalik murabbiylar hamda xorijlik legioner futbolchilari kelib qo‘shilishi kutilayapti. Luisma Ernandes boshchiligidagi murabbiylar shtabi Ispaniyadan, Yosovich, Stamenkovich hamda Obradovichlar esa Serbiyadan uchib kelishadi.
Ikkinchi yig‘in 29 yanvar sanasigacha davom etishi belgilangan. Yig‘in davomida futbolchilarning jismoniy tayyorgarligini maromiga yetkazish barobarida sparring raqiblar bilan nazorat uchrashuvlari o‘tkazilishi ham ko‘zda tutilgan. Jumladan, 19 yanvar kuni Toshkentning “Lokomotiv” jamoasi bilan, 25 dekabrda esa Samarqandning “Dinamo” jamoasi bilan kuch sinashishga kelishib olingan. Mazkur uchrashuvlarning bo‘lib o‘tadigan vaqti va manzili yaqin kunlar ichida oydinlashadi" - deyiladi bekobodliklarning matbuot xizmati tarqatgan xabarda.
