“Manchester Yunayted” barcha musobaqalarda g‘alabali seriyasini yettita o‘yinga yetkazdi.
Bosh murabbiy Erik ten Xag shogirdlari Angliya kubogining uchinchi bosqichida “Everton”ni 3:1 hisobida mag‘lub etishdi.
"Manchester Yunayted" 12 karra Angliya kubogi sohibi. Jamoa oxirgi marta kubokni 2016 yilda qo‘lga kiritgan edi. "Everton" besh marta turnirda g‘alaba qozongan. "Irislar"ning Angliya kubogidagi so‘nggi muvaffaqiyati 1995 yilga to‘g‘ri keladi.
Mankunianliklar 10 noyabrdan beri rasmiy o‘yinlarda mag‘lub bo‘lmayapti – o‘shanda ularning hozirgi g‘alabalar seriyasi boshlangandi.
O‘shandan beri "Manchester Yunayted" "Aston Villa" (4:2), "Fulxem" (2:1), "Byornli" (2:0), "Nottingem Forest" (3:0), "Vulverxempton" (1:0), "Bornmut" (3:0) va "Everton" (3:1) klublarini mag‘lub etgan.
Jamoa navbatdagi o‘yinni 10 yanvar kuni Angliya liga kubogi 1/4 finalida "Charlton"ga qarshi o‘tkazadi.
14 yanvar kuni “Manchester Yunayted” APL doirasida “Manchester Siti”ga qarshi bahs olib boradi.
