"Bavariya" va Senegal terma jamoasi hujumchisi Sadio Mane tizzasidan olgan jarohatidan keyin tiklanish bosqichining so‘nggisida turibdi.
Sadio Mane noyabr oyi boshida jarohat oldi, bu esa uni JCHdan chetda qoldirdi va "PSJ"ga qarshi bo‘lib o‘tadigan birinchi o‘yinda ishtirok etishi shubha ostida qoldi. "Bavariya" bosh murabbiyi Yulian Nagelsmann o‘z shogirdining salomatligi haqida muxlislarni biroz tinchlantirdi.
"Agar hamma narsa a’lo darajada bo‘lsa, u Parijda o‘ynay oladi. Hali kichik xavf bor, ammo tiklanish jarayoni biz kutganimizdan tezroq kechmoqda. Sadio 70 foiz tayyor. Aniq prognozlar aytmayman, ko‘ramiz u qanday munosabatda bo‘ladi. Men Manega bosim o‘tkazmayman", - dedi Nagelsmann klub matbuot xizmatiga.
Eslatib o‘tamiz, "Bavariya" Chempionlar ligasi pley-off bosqichidagi ilk o‘yinni 14 fevral kuni "PSJ"ga qarshi safarda o‘tkazadi.
