"Бавария" ва Сенегал терма жамоаси ҳужумчиси Садио Мане тиззасидан олган жароҳатидан кейин тикланиш босқичининг сўнггисида турибди.
Садио Мане ноябрь ойи бошида жароҳат олди, бу эса уни ЖЧдан четда қолдирди ва "ПСЖ"га қарши бўлиб ўтадиган биринчи ўйинда иштирок этиши шубҳа остида қолди. "Бавария" бош мураббийи Юлиан Нагельсманн ўз шогирдининг саломатлиги ҳақида мухлисларни бироз тинчлантирди.
"Агар ҳамма нарса аъло даражада бўлса, у Парижда ўйнай олади. Ҳали кичик хавф бор, аммо тикланиш жараёни биз кутганимиздан тезроқ кечмоқда. Садио 70 фоиз тайёр. Аниқ прогнозлар айтмайман, кўрамиз у қандай муносабатда бўлади. Мен Манега босим ўтказмайман", - деди Нагельсманн клуб матбуот хизматига.
Эслатиб ўтамиз, "Бавария" Чемпионлар лигаси плей-офф босқичидаги илк ўйинни 14 февраль куни "ПСЖ"га қарши сафарда ўтказади.
