Kecha «Arsenal» APLning 20-turi markaziy uchrashuvida «Tottenxem»ni 2:0 hisobida mag‘lub etdi. Mikel Arteta jamoasi Premyer-ligada peshqadamlik qilmoqda va «Manchester Siti»dan 8 ochko oldinda. London derbisi yakuniga yetgach, g‘olib jamoa darvozaboniga raqib muxlislari hujum qildi.

Remsdeyl ancha hissiyotli darvozabon. Ba’zan «Arsenal»ning g‘alabalari va mag‘lubiyatlarini o‘z emosiyalari orqali bo‘rttirib nishonlab yuboradi: u jamoasining muvaffaqiyatsizliklaridan g‘azablanadi va g‘alabalarda o‘zini tiyib tura olmaydi. Kechagi bahsda bo‘lgan muvaffaqiyat ham bundan mustasno emas edi: final hushtagidan so‘ng Aaron derbida qo‘lga kiritilgan uch ochkodan xursand bo‘ldi va «Tottenxem» muxlislariga turli ishoralar qildi. Biroq undan avval Aaron Risharlison bilan janjallashdi. Braziliyalik futbolchi qizg‘in pallada darvozabonni itarib yubordi, keyin qolganlar mojaroga qo‘shildi. Ammo o‘sha paytda, futbolchilar hali Remsdeylni o‘rab olishga ulgurmaganlarida bir muxlis kiperga hujum qildi: tomoshabin reklama taxtasiga sakrab chiqdi va u yerdan darvozabonni oyoqlari bilan tepdi.

Futbolchi bunga chiday olmadi va mushtlashuvga qo‘shildi, biroq styuardlar tezda ishqibozni chetga olishdi. Remsdeylni ham sudrab olib ketishga to‘g‘ri keldi. Inglizning uzoq vaqt jahli chiqdi. «Tottenxem» esa bu haqda rasmiy bayonot bilan chiqqan. «Biz o‘yin oxirida «Arsenal» darvozaboni Aaron Remsdeylga hujum qilishga uringan muxlisning xatti-harakatidan hayratda qoldik. Futbolda zo‘ravonlikka o‘rin yo‘q. Polisiya Aaron Remsdeyl bilan kechgan voqeani ko‘rib chiqmoqda, shu jumladan muxlisning «Tottenxem» stadioniga kirishi darhol taqiqlanadi, deyiladi klub bayonotida.