«Manchester Yunayted» va Fransiya terma jamoasining sobiq himoyachisi Patris Evra «Liverpul»ning joriy mavsumdagi muvaffaqiyatsizliklari sabablari haqida o‘z fikri bilan o‘rtoqlashdi.

Eslatib o‘tamiz, ayni damda mersisaydliklar 18 uchrashuvda 28 ochko jamg‘arib, APL turnir jadvalida 9-o‘rinda bormoqda.

Evraning so‘zlariga ko‘ra, hujumchi Sadio Manening «Bavariya»ga ketishi «qizillar»ning o‘yiniga jiddiy ta’sir qilgan.

«Odamlar buni tan olishni xohlamaydilar, ammo Sadio Manening ketishi «Liverpul»ga bu mavsumda zarar keltirdi. Tushundimki, bu faqat bitta futbolchi emas, balki u Klopp jamoasining muhim qismi edi», - deya Evradan iqtibos keltiradi Betfair.

Shuningdek, fransiyalik futbolchi «Liverpul» kelasi mavsumda bu yo‘qotishdan to‘liq qutula olishiga ishonch bildirdi.

Mane 2016 yildan 2022 yilgacha mersisaydliklar sharafini himoya qilgan. Senegallik futbolchi «qizillar» safida jami 269 ta o‘yin o‘tkazib, 120 ta gol urgan va 48 ta golli uzatmani amalga oshirgan.