«Манчестер Юнайтед» ва Франция терма жамоасининг собиқ ҳимоячиси Патрис Эвра «Ливерпул»нинг жорий мавсумдаги муваффақиятсизликлари сабаблари ҳақида ўз фикри билан ўртоқлашди.

Эслатиб ўтамиз, айни дамда мерсисайдликлар 18 учрашувда 28 очко жамғариб, АПЛ турнир жадвалида 9-ўринда бормоқда.

Эвранинг сўзларига кўра, ҳужумчи Садио Маненинг «Бавария»га кетиши «қизиллар»нинг ўйинига жиддий таъсир қилган.

«Одамлар буни тан олишни хоҳламайдилар, аммо Садио Маненинг кетиши «Ливерпул»га бу мавсумда зарар келтирди. Тушундимки, бу фақат битта футболчи эмас, балки у Клопп жамоасининг муҳим қисми эди», - дея Эврадан иқтибос келтиради Бетфаир.

Шунингдек, франциялик футболчи «Ливерпуль» келаси мавсумда бу йўқотишдан тўлиқ қутула олишига ишонч билдирди.

Мане 2016 йилдан 2022 йилгача мерсисайдликлар шарафини ҳимоя қилган. Сенегаллик футболчи «қизиллар» сафида жами 269 та ўйин ўтказиб, 120 та гол урган ва 48 та голли узатмани амалга оширган.