Andijondagi "Bobur Arena" stadionida maydon chimini yangilash ishlari hamon davom etyapti.
O‘zPFL har yili klublar oldidagi infratuzilma bo‘yicha talablarni yanada qat’iylashtirib bormoqda. Avvalroq projektorlar masalasi kun tartibidagi eng dolzarb mavzuga aylangan bo‘lsa, endilikda sifatli maydon bo‘yicha ham klublarimiz jiddiy ish olib borishlari talab etilyapti.
Andijon shahridagi "Bobur Arena"da maydon chimini yangilash ishlari kuzdayoq boshlangan edi. Hozirgacha eski chim olib tashlanib, drenaj-sug‘orish tizimi o‘tkazish borasidagi ishlar davom etyapti. Jarayon noyabrda boshlangan bo‘lsa-da, biroq hali yangi chim o‘tqazishga ulgurilganicha yo‘q va chim yetishtiruvchilarning fikriga ko‘ra, katta ehtimol "Bobur Arena" may oyiga qadar katta futbol uchrashuvlarini qabul qila olmasligi mumkin. Shuningdek, stadionga yangi projektor chiroqlari o‘rnatish masalasi ham hozircha yakuniga yetmadi.
Shu kabi omillarni inobatga olib, yangi mavsumdagi uy uchrashuvlarini aynan shu stadionda o‘tkazishni rejalashtirgan "Andijon-SGS" klubi Farg‘onadagi "Istiqlol" arenasi bilan ijara shartnomasi imzoladi va ilk davra o‘yinlarini Farg‘onada o‘tkazadigan bo‘ldi.
Superligaga qaytgan, viloyatning bosh jamoasi "Andijon" klubi esa mavsum boshidagi uchrashuvlarini qayerda o‘tkazish masalasini yaqin kunlarda hal etadi.
