Андижондаги "Бобур Арена" стадионида майдон чимини янгилаш ишлари ҳамон давом этяпти.
ЎзПФЛ ҳар йили клублар олдидаги инфратузилма бўйича талабларни янада қатъийлаштириб бормоқда. Аввалроқ прожекторлар масаласи кун тартибидаги энг долзарб мавзуга айланган бўлса, эндиликда сифатли майдон бўйича ҳам клубларимиз жиддий иш олиб боришлари талаб этиляпти.
Андижон шаҳридаги "Бобур Арена"да майдон чимини янгилаш ишлари куздаёқ бошланган эди. Ҳозиргача эски чим олиб ташланиб, дренаж-суғориш тизими ўтказиш борасидаги ишлар давом этяпти. Жараён ноябрда бошланган бўлса-да, бироқ ҳали янги чим ўтқазишга улгурилганича йўқ ва чим етиштирувчиларнинг фикрига кўра, катта эҳтимол "Бобур Арена" май ойига қадар катта футбол учрашувларини қабул қила олмаслиги мумкин. Шунингдек, стадионга янги прожектор чироқлари ўрнатиш масаласи ҳам ҳозирча якунига етмади.
Шу каби омилларни инобатга олиб, янги мавсумдаги уй учрашувларини айнан шу стадионда ўтказишни режалаштирган "Андижон-SGS" клуби Фарғонадаги "Истиқлол" аренаси билан ижара шартномаси имзолади ва илк давра ўйинларини Фарғонада ўтказадиган бўлди.
Суперлигага қайтган, вилоятнинг бош жамоаси "Андижон" клуби эса мавсум бошидаги учрашувларини қаерда ўтказиш масаласини яқин кунларда ҳал этади.
