"Sportico" nashri tayyorlagan maqolada aytilishicha, APL jamoalarining umumiy qiymati oshgan. Bunga turnir translasiya haqqining ko‘paygani va stadionga muxlislarning qaytgani katta ta’sir ko‘rsatgan. Pandemiya paytida stadionlar yopilib, o‘yinlar yopiq eshiklar ortida o‘tkazila boshlangan edi. Hozir esa vaziyat yaxshi tomonga o‘zgargan.

Hisob-kitoblarga ko‘ra, Angliyadagi eng qimmat klub bu "Manchester Yunayted" hisoblanadi. Klubning umumiy qiymati 4,8 milliard funtga baholangan. "Qizil iblislar" bu borada o‘z raqobatchisi bo‘lgan "Liverpul"dan ancha o‘tib ketgan. Mersisaydliklar ayni damda 3,8 milliardga arziydi deb hisoblanmoqda. Shuni alohida ta’kidlash kerakki, hozirda har ikki klub sotuvga qo‘yilgan. Xususan, "MYU" egasi bo‘lgan Gleyzerlar xonadoni klubni 7 milliardga sotishga rozi bo‘lishini bildirgan. Unga Angliyaning eng boy kishisi Ser Jim Retkliff qiziqish bildirgandi.

Boshqa bir tomonda "Liverpul"ga egalik qiluvchi "FSG" butun klubni sotishini ma’lum qilgandi. Ammo keyinchalik niyatidan qaytib, jamoaning aksiyalarini bir qisminigina sotishini e’lon qildi.
Ro‘yxatda "Manchester Siti" uchinchi pog‘onada keltirilgan bo‘lib, arablar jamoasi 3,5 milliardlik qiymatga egadir. To‘rtinchi o‘rinda "Arsenal" qayd qilingan. Ushbu London klubi 2,9 milliard funtga narxlanadi. Bu orqali "Arsenal" ilk bor "Chelsi"dan o‘zib ketdi. "Ko‘klar" 2,8 milliard funtga baholandi. Shuningdek, ro‘yxatda milliard bilan baholangan so‘nggi klub keltiriladi va u "Tottenxem"dir. Bu jamoaga qiziquvchilar 2,6 milliard funt to‘lashi talab etiladi.

Qolgan jamoalar ichida "Vest Xem" eng qimmatidir. London klubing narxi 539 million funtga teng. Yuqoridagi rasmda to‘liq ro‘yxatdan bilan tanishishingiz mumkin.

ISMATOV J.