35 yoshli Luis Suares Braziliyaning «Gremio» klubidagi debyutini «xet-trik» va sovrin bilan bezadi.
35 yoshli Luis Suares Braziliyaning «Gremio» klubidagi debyutini «xet-trik» va sovrin bilan bezadi. E’tiborlisi, urugvaylik hujumchi 3ta golini ham birinchi bo‘limda, aniqrog‘i, 34 daqiqa oralig‘ida rasmiylashtirdi. To‘g‘ri, raqib ancha kuchsiz edi - Braziliya chempionati To‘rtinchi divizioni ishtirokchisi «San-Luis». Xullas, «Gremio» Riu-Grandi-du-Sul shtati superkubogi uchun kechgan bahsda «qopag‘on» Suaresning 3ta goli evaziga 4:1 hisobida g‘alaba qozondi.
Alohida aytish kerak, yevrofutbolda rosa yayragan Luis Suares oxirgi marta 2013 yili o‘yinning birinchi bo‘limidayoq «xet-trik» qayd etgandi. O‘shanda «Liverpul» safida to‘p surgan urugvaylik «Norvich» darvozasini 3 bora o‘qqa tutgan. «Gremio»dagi orzu misoli debyutiga kelsak, Luis 57-daqiqada o‘rnini yana bir faxriy futbolchi - 37 yoshli Diyego Souzaga bo‘shatib berdi. O‘yindan so‘ng mamnun va mag‘rur «El Pistolero» ijtimoiy tarmoqlarda Braziliyada qo‘lga kiritgan ilk sovrinini alohida ko‘z-ko‘z qildi va qo‘shib qo‘ydi: «O‘ylaymanki, bu men uchun eng yaxshi debyut».
«Gremio» bosh murabbiyi Renato ham o‘z hayratini yashirgani yo‘q: «Suaresning debyuti bundan yaxshi bo‘lishi mumkin emasdi. Muxlislar unga to‘liq ishonishadi, xuddi biz kabi. Mana, Luis birinchi o‘yindayoq bu yerga nega kelganini ko‘rsatib qo‘ydi. Kamtarligi hisobiga tezda moslashdi va darhol ishga tushdi».
«Gremio» Luis Suares transferini 2022 yilning oxirida e’lon qilgandi. Klub bilan 2 yillik shartnoma tuzgan urugvaylik forvardning «Arena Gremio»dagi tanishtiruv marosimida 60 ming muxlis to‘plandi. Tribunalar liq to‘lganini ko‘rgan, mislsiz shovqinni eshitgan futbolchi bunga o‘zgacha minnatdorchilik bildirgandi: «E’tibor uchun rahmat! Aql bovar qilmas qabul. Qani ketdik!»
