Dunyoning eng boy jamoalarining biri bo‘lgan "Nyukasl Yunayted" yanvarning so‘ngiga qadar o‘z nishonlarini ishg‘ol etishga harakat qilmoqda. Eddi Xau jamoasi yanvar mobaynida sokinlikni saqlab keldi. Klub rahbariyati kerakli futbolchini munosib narxda sotib olishni maqsad qilgan. Shu sababli, haligacha yangilik qilmadi. Ammo klub kuchli to‘rtlikka kirishni istasa, u holda tarkibni yanada optimallashtirishi lozim. Quyida "qarg‘alar" qolgan uch kun davomida kimlarni sotib olishi haqida gaplashamiz.
Ko‘zlangan futbolchilar ichida eng qimmati sifatida "Everton" vingeri Entoni Gordon ta’kidlangan. 21 yoshli ingliz futbolchisi "Nyukasl"ga 40 million funtga tushishi aytilgan. Ammo "Everton"da Gordonni sotish niyati yo‘q. Chunki liverpulliklar uni 60 millionga arziydi deb hisoblashadi.
Agarda hujumchi "Nyukasl"ga yo‘l olsa, u holda Gordon chap qanotda, Sent-Maksimen bilan raqobatga kirishadi. Gordonga yarim himoyada yana bir yangi nom yordam beradi.
Italiyaning "Roma" klubi yulduzi Nikolo Zanyolo "Nyukasl"ning yana bir transfer nishoni hisoblanadi. 23 yoshli italiyalik avval-boshda "Tottenxem"ga o‘tishi mumkin edi. Ammo o‘rtaga "Nyukasl" suqulib, Zanyolo uchun 31 million funt taklif qildi. Taklif rad etildi. Ammo "Nyukasl"ning istagi so‘nmadi. "Roma" esa yarim himoyachi uchun 35 million funt atrofidagi taklifni kutmoqda. Zanyolo APLga o‘tib, "Nyukasl" yarim himoyasidagi kamchiliklarga da’vo bo‘la oladi. Shuningdek, tayanch zonasiga "MYU" futbolchisi Skott Maktomineyni olish rejalashtirilgan.
Hujumni kuchaytirish uchun ishlar yakuniga yetmaydi. Qayd etilishicha, "Chelsi" vingeri Xakim Ziyesh ham 1 fevralga qadar Nyukasl shahriga olib kelinishi mumkin. 29 yoshli Marokash terma jamoasi a’zosi uchun taklif etilgan summaning hajmi ma’lum qilinmagan. Shuningdek, "Chelsi"ning boshqa futbolchilari bo‘lgan Konor Gallaxer hamda Ruben Loftus-CHiklar ham jiddiy kuzatuvda turibdi. Eslatib o‘tamiz, ayni damda "Nyukasl" 39 ochko to‘plagan holda APL turnir jadvalining 3 o‘rinidan joy olgan. "Qarg‘alar" o‘zining keyingi bahsini "Vest Xem"ga qarshi o‘tkazishadi.
ISMATOV J.
