"PSJ" va "Nottingem Forest" Keylor Navasni ijarasi borasida muzokaralar olib bormoqda.

L'Equipe xabariga ko‘ra, ingliz klubi Parij klubiga darvozabon uchun maoshining 50 foizi to‘lanadigan sotib olish huquqisiz ijara taklifi bilan chiqqan.

Bunday taklif "PSJ"ga ma’qul kelishi mumkin, ammo fransuz klubi avvalo ijaraga berilgan futbolchilar bilan bog‘liq muammolarni hal qilishi kerak. "PSJ"ning allaqachon 8 nafar futbolchisi boshqa jamoalarga ijaraga berilgan, parijliklar esa boshqa futbolchini ijaraga berishga haqli emas.

Shu munosabat bilan Luish Kampush kamdan-kam maydonga tushadigan futbolchilardan birining ijarasidan voz kechishi mumkin. Uning ismi hozircha noma’lum.

Avvalroq Navas "Nottingem Forest"ga o‘tishga rozi bo‘lgani ma’lum bo‘lgandi. Xabar qilinishicha, uning "PSJ"dagi maoshi soliqlarsiz yiliga 9 million yevroni tashkil qiladi.

Joriy mavsumda 36 yoshli darvozabon "PSJ" safida barcha turnirlarda (ikkalasi ham Fransiya kubogida) bor yo‘g‘i 2 ta o‘yinda maydonga tushdi.