Yarim himoyachi Enso Fernandes "Chelsi"ga o‘tdi.
O‘tkazma haqidagi ma’lumot Portugaliya Qimmatli qog‘ozlar bozori komissiyasining veb-saytida paydo bo‘ldi.
London klubi 22 yoshli yarim himoyachi uchun "Benfika"ga bir necha transhlarda 121 million yevro to‘laydi.
Argentinalik futbolchining “ko‘klar” bilan shartnomasi 2031 yilning yoziga qadar mo‘ljallangan. Klublar hozircha shartnomani e’lon qilgani yo‘q.
121 million yevro (taxminan 105 million funt) ingliz futboli uchun rekord xarid hisoblanadi. Bungacha rekord Jek Grilishning transferi edi, buning uchun "Manchester Siti" "Aston Villa"ga 100 million funt to‘lagan.
Enso "Chelsi"ning yanvardagi transfer oynasida sakkizinchi transferi bo‘ldi. Umuman olganda, Todd Bouli boshchiligidagi yangi xo‘jayinlar qo‘l ostidagi klub allaqachon 16 ta transferni amalga oshirgan.
Fernandes "River Pleyt"dan ko‘chib o‘tgandan so‘ng o‘tgan yozdan beri "Benfika"da o‘ynamoqda. Bu uning Yevropa futbolidagi ilk mavsumi edi.
