Ярим ҳимоячи Энцо Фернандес "Челси"га ўтди.
Ўтказма ҳақидаги маълумот Португалия Қимматли қоғозлар бозори комиссиясининг веб-сайтида пайдо бўлди.
Лондон клуби 22 ёшли ярим ҳимоячи учун "Бенфика"га бир неча траншларда 121 миллион евро тўлайди.
Аргентиналик футболчининг “кўклар” билан шартномаси 2031 йилнинг ёзига қадар мўлжалланган. Клублар ҳозирча шартномани эълон қилгани йўқ.
121 миллион евро (тахминан 105 миллион фунт) инглиз футболи учун рекорд харид ҳисобланади. Бунгача рекорд Жек Грилишнинг трансфери эди, бунинг учун "Манчестер Сити" "Астон Вилла"га 100 миллион фунт тўлаган.
Энцо "Челси"нинг январдаги трансфер ойнасида саккизинчи трансфери бўлди. Умуман олганда, Тодд Боули бошчилигидаги янги хўжайинлар қўл остидаги клуб аллақачон 16 та трансферни амалга оширган.
Фернандес "Ривер Плейт"дан кўчиб ўтгандан сўнг ўтган ёздан бери "Бенфика"да ўйнамоқда. Бу унинг Европа футболидаги илк мавсуми эди.
