Швеция терма жамоаси ва «Барселона» клуби ҳужумчиси Руни Баржининг нима сабабдан Жаҳон чемпионати қайдномасига киритилмагани ойдинлашди. Инсайдер Леонардо Бертоццининг ижтимоий тармоқларда хабар беришича, бунга футболчининг терма жамоа ичидаги номақбул хулқ-атвори сабаб бўлган.
Воқеа Швеция терма жамоасининг ЖЧ-2026 йўлланмасини қўлга киритгани муносабати билан ташкил этилган расмий кечки овқат пайтида юз берган. Маълумотларга кўра, Баржи саралашнинг ҳал қилувчи баҳсларида майдонга тушмаганидан қаттиқ норози бўлган.
Хусусан, у Украинага қарши ўтиш ўйинида (3:1) захирада қолдирилгани ва Польша билан финал баҳсида (3:2) ҳатто қайдномага ҳам киритилмагани учун жамоадошлари ва мураббийлар штаби олдида ёмон кайфият намойиш этган. Ҳужумчи «Барселона»дек клубда ўйнашига қарамай, терма жамоада имконият берилмаётганидан норозилигини очиқ билдирган.
Манбанинг таъкидлашича, футболчининг бундай хатти-ҳаракати жамоадаги муҳитга салбий таъсир кўрсатган ва бош мураббий уни мундиалга олиб кетмасликка қарор қилган.
