Португалиялик машҳур мураббий Жозе Моуриньо шу ёзда Мадриднинг «Реал» клуби бошқарувига қайтиши кутилмоқда. The Touchline нашри журналист Мигель Серранога таяниб хабар беришича, «The Special One» аллақачон Мадрид клубининг уч нафар асосий футболчиси билан мулоқот ўтказган.

Манбага кўра, Моуриньо дарвозабон Тибо Куртуа ҳамда ҳужумчилар Килиан Мбаппе ва Винисиус Жуниор билан суҳбатлашган. Бу қадам португалиялик мураббийнинг Мадридга қайтишга жиддий тайёргарлик кўраётганидан далолат беради.

Ҳозирда Жозе Моуриньо Лиссабоннинг «Бенфика» клубини бошқармоқда. Унинг жамоаси 16 май, шанба куни «Эшторил»га қарши мавсумдаги сўнгги ўйинини ўтказади. «Бургутлар» айни дамда Португалия чемпионати турнир жадвалида учинчи ўринни эгаллаб турибди.

Эслатиб ўтамиз, Жозе Моуриньо 2010–2013 йиллар давомида ҳам «Реал»ни бошқарган ва 2012 йилда жамоа билан Испания чемпионлигини қўлга киритган эди.