“Belshina” futbol klubi sardori Dmitriy Gomza yanvar oyi o‘rtalarida Aleksandr Lukashenkoning xavfsizlik kuchlari tomonidan qo‘lga olindi, deya xabar bermoqda Tribuna.com sayti.
Manbaga ko‘ra, futbolchi ikki kun hibsda bo‘lgan, shundan so‘ng u ozod qilingan. Hujumchining hibsga olinishining aniq sababi oshkor qilinmadi. Biroq, avvalroq OAVda Belarus chempionatining “Belshina” – “Shaxtyor” uchrashuvi shartnomaviy xarakterga ega bo‘lishi mumkinligi haqida xabarlar tarqalgandi. Bu o‘yinda aynan Gomza o‘z darvozasiga penalti "olib keldi".
Avvalroq, 30 yanvar kuni Lukashenkoning xavfsizlik xizmati Belarus futbol chempionati o‘yini natijasiga ta’sir ko‘rsatgan “Shaxtyor” vakiliga nisbatan jinoiy ish qo‘zg‘atgani ma’lum bo‘lgan edi. Shu kuni ma’lum bo‘lishicha, xavfsizlik kuchlari klub ofisiga kelib, "Shaxtyor" direktori Aleksandr Marchenkoni o‘zlari bilan olib ketishgan.
