"Yuventus"dan yana ochkolar olib tashlanishi mumkin.
Italiya futbol federasiyasi (FIGC) pandemiya davrida klubning futbolchilarning maoshlari bilan bog‘liq firibgarliklarini tekshirishda davom etmoqda.
Corriere dello Sport nashrining xabar berishicha, federasiya bosh prokurori “byankonerlar”dan kamida 20 ochko olib tashlashni talab qilmoqchi.
Ish 29 yanvar kuni yopilishi kerak edi, biroq yangi hujjatlar topilgani munosabati bilan FIGC prokuraturasi tergov muddatini yana 40 kunga uzaytirishni so‘radi. Hukm mart oyida e’lon qilinishi kerak.
Qayd etilishicha, belgilangan muddatdan keyingi tergov "Yuventus" uchun himoya argumentlaridan biriga aylanishi mumkin.
Eslatib o‘tamiz, avvalroq "Yuventus"dan moliyaviy firibgarlik uchun 15 ochko olib tashlangan edi. Turinliklar hozirda 23 ochko bilan A Seriyada 13-o‘rinda bormoqda.