2022 yilning yozida o‘ziga zaxira darvozaboni izlayotgan "Manchester Yunayted" "Nyukasl" posboni Martin Dubravka bilan shartnoma imzolashga qaror qildi. Avvalgi mavsumda "hakkalar"ning asosiy darvozaboni bo‘lgan Dubravka saviyasi yuqoriroq jamoaga 1 yilga ijaraga berildi.
Qishda “Yunayted” va “Nyukasl” futbolchini ortga qaytarish yaxshiroq deb qaror qilishdi. Bu vaqt ichida u "qizil iblislar" safida atigi ikkita o‘yin o‘tkazdi, ikkalasi ham Liga kubogida - "Aston Villa" va "Byornli"ga qarshi. Qizig‘i shundaki, ushbu kubok uchun finalda Martin o‘ynagan ikkala klub o‘zaro kurash olib boradi. Va u qiyin dilemmaga duch keladi.
U Liga Kubogida "Yunayted" safida o‘ynagani uchun mankunianliklar kubok sohibiga aylansa, oltin medalga ega chiqadi. "Nyukasl" esa uni ushbu turnirda maydonga tushira olmaydi va agar "hakkalar" finalda g‘alaba qozonsa, Dubravka medalsiz qolib ketadi.
Qiziq, besh yildan buyon harakat qilayotgan klubingizning mag‘lubiyati sizga mukofot olib kelishini hech tasavvur qilib ko‘rganmisiz?
