"Bavariya" yarim himoyachisi Joshua Kimmix jamoaning yangi sardori bo‘lishi mumkin. Myunxenliklar bosh murabbiyi Yulian Nagelsmann darvozabon Manuel Noyerdan sardorlik bog‘ichini olib, Kimmixga berish haqida jiddiy o‘ylamoqda.
Bild nashri xabariga ko‘ra, agar shunday qaror qabul qilinsa, bu keyingi mavsumdan boshlab kuchga kiradi. Eslatib o‘tamiz, Noyer oyog‘i singanligi sababli joriy mavsumning qolgan qismini o‘tkazib yuboradi.
Yaqinda Manuel shov-shuvli intervyu berib, "Bavariya" rahbariyatini darvozabonlar murabbiyi Toni Tapalovichni ishdan bo‘shatgani uchun tanqid qilgandi. Qayd etilishicha, darvozabon avvalroq Nagelsmann bilan keskin munosabatda bo‘lgan.
