“Andijon” tarkibida ko‘pni ko‘rgan, mahoratli futbolchilar to‘p surishyapti. Ulardan biri shubhasiz Ildar Mamatkazin bo‘lib, o‘tgan mavsumda jamoaning pro ligadan Superligaga qaytishida katta hissasini qo‘shdi.

U sardor sifatida o‘zini ko‘rsatdi va yilning eng yaxshi futbolchisiga aylandi. Ayni chog‘da Ildar Antaliyada yangi mavsum uchun astoydil tayyorlanmoqda.

Kecha Superliga uchun qur’a tashlangach, Mamatkazinni suhbatga tortdik.

- Yangi mavsum uchun qur’a tashlandi. Bundan nimani kutgandingiz?

- Bizga kimga qarshi o‘ynashning farqi yo‘q. Baribir ertami-kechmi, barcha jamoa bilan o‘ynaymiz. Faqat uyda o‘ynashni xohlagandim. Ya’ni, ilk turni muxlislarimiz ko‘z o‘ngida o‘tkazish istagida edik. Ammo stadionimiz ta’mirlanyapti. Mayli, safarda bo‘lsa ham biz yaxshi natijalar ko‘rsatishga harakat qilamiz. Ha, chempionatning ilk turini “Nasaf”ga qarshi o‘tkazamiz va oson bo‘lmaydi. Hamma biladi, bu yaxshi jamoa.

- Qur’adan avval qaysi raqibni o‘ylagandingiz?

- “Qizilqum” yoki “So‘g‘diyona” jamoasi tushadi, deb o‘ylagandim. O‘zinglar ko‘rdinglar, “Nasaf” to‘g‘ri keldi. Yaxshi natijaga erishish uchun qattiq kurashamiz. Yaxshi tayyorgarlik olib boryapmiz. Endi murabbiylar raqibni ham o‘rganib chiqishni boshlashadi.

- Shaxsiy fikringizcha, “Nasaf”ning asosiy kuchi nimada? Raqibni qanday yengish mumkin? Har qalay bu jamoada oldin to‘p surgansiz va yaxshi bilasiz.

- “Nasaf”ning asosiy quroli – bu jamoaviy o‘yin. Ko‘proq jamoaviy o‘yinga e’tibor qaratadi. 3-4 yildan beri bitta tarkib bilan harakat qilib kelyapti. O‘yinchilari bir-birini yaxshi tushunadi. O‘yini shakllangan. Bosh murabbiyi Ro‘ziqul Berdiyev ko‘proq taktikaga ham e’tibor beradi. Bu – futbol. Biz ham u yerga shunchaki bormaymiz, bor kuchimiz bilan harakat qilamiz. Murabbiylarimiz ham to‘g‘ri taktika tanlashadi. Jiddiy tayyorgarlik ko‘ramiz. To‘g‘ri taktika tanlansa, har qanday raqibga qarshi o‘ynasa va yaxshi natijaga erishsa bo‘ladi. Murabbiylarimiz shuning ustida ish olib boradilar. Albatta, imkoniyatimiz bor. 1-tur uchrashuvigacha biroz vaqt bor. Endi bor e’tiborni bo‘lajak o‘yinga qaratamiz.

- Jamoaning kayfiyati va muhit qanday? Antaliyadagi yig‘inda asosiy e’tibor nimaga qaratilyapti?

- Bundan avval Dukentda shug‘ullandik. U yerda asosiy yuklamalar olindi. Bu yerga kelganimizda dastlabki 3-4 kun davomida yana yuklamalar oldik va o‘rtoqlik uchrashuvlarini o‘tkazdik. Katta “nagruzka” olib o‘yinga chiqish har qanday futbolchiga qiyinchilik tug‘diradi. Hozir yana o‘yinlar bo‘ladi va har xil taktikalar ustida ishlayapmiz. Yangi o‘yinchilar ham kelgan. O‘z o‘yinimizni shakllantiramiz. Jamoamizda muhit a’lo darajada. Barcha futbolchilar inoq hamda bir-birini qo‘llab-quvvatlashyapti. Mashg‘ulotlarimiz ancha quvnoq va qiziqarli kechyapti. Muhit yaxshiligidan olayotgan “nagruzka”larimiz ham unchalik sezilmayapti. Shunday ruhda davom etamiz.

- O‘tgan yili ham “Andijon” Antaliyada yig‘in o‘tkazgandi va bu chempionat mobaynida ijobiy ta’sirini ko‘rsatgan. Bu safargi yig‘indan so‘ng chempionatga qanchalik ta’sir ko‘rsatadi, deb o‘ylaysiz?

- O‘tgan yili ham kuchli raqiblarga qarshi o‘ynaganmiz. Antaliyada yaxshi sharoitlar bor. Maydonlar sifati zo‘r va raqiblar ham ajoyib. Futbolchilar uchun barcha narsa mavjud. Qanchalik foyda berishini mavsum boshlanganida bilamiz. Lekin baribir ijobiy tarafdan katta ta’siri bo‘ladi. Asta-sekin jamoaviy o‘yinni shakllantirishga ko‘proq urg‘u berilyapti. O‘rtoqlik uchrashuvlarida yangi kelgan futbolchilar tezroq jamoamizga kirishib ketsa, ancha yaxshi bo‘ladi.

- Tarkib chindan ham yangi ijrochilar evaziga yanada kuchaytirilyapti. Seleksiya ishlaridan qanchalik qoniqyapsiz?

- Legionerlarning yaxshi saviyada ekanligi bilinib turibdi. Jismoniy tayyorgarlik ustida ham ishlashyapti. Albatta, ularning yordami tegadi. Boshqa kelgan o‘yinchilar ham “Andijon”ning g‘alabalariga o‘z hissasini qo‘shishlariga ishonaman.