"PSJ" bosh murabbiyi Kristof Galtyening fikricha, hujumchi Kilian Mbappe "Bavariya"ga qarshi birinchi o‘yinda ishtirok eta olmaydi.
14 fevral kuni "PSJ" Chempionlar ligasi 1/8 finali doirasida o‘z maydonida Myunxen klubini qabul qiladi. So‘nggi haftalarda Yevropa futbolida eng ko‘p muhokama qilingan mavzulardan biri Mbappening jarohati bo‘ldi, shu sababli fransiyalik futbolchi "Bavariya"ga qarshi uy o‘yinini o‘tkazib yuborish xavfi bor.
Galtyening so‘zlariga ko‘ra, parijlik muxlislarning qo‘rquvi o‘z tasdig‘ini topdi: "Mbappe "Bavariya"ga qarshi bo‘lajak o‘yin uchun tarkibda bo‘ladimi? Yo‘q, men bunday deb o‘ylamayman. U jarohat olgan va biz uning sog‘lig‘ini xavf ostiga qo‘ymoqchi emasmiz", - deya "PSJ" bosh murabbiyi so‘zlaridan iqtibos keltiradi jurnalist Saber Dersfarj.