14 fevral kuni uzoq kutilgan Chempionlar ligasi boshlanadi. Oldinda qiziqarli pley-off o‘yinlari. Saudiya Arabistoniga jo‘nab ketgan hujumchi Krishtianu Ronaldu 2005/2006 yilgi mavsumdan beri ilk bor turnirning bahorgi bosqichini o‘tkazib yuboradi.
Ronaldu o‘sha Chempionlar Ligasida qanday o‘ynagan edi?
"Manchester Yunayted" o‘sha mavsumda saralash bahsi orqali guruh bosqichiga chiqqan edi. Biroq ingliz klubi bu muammoni juda oson hal qildi, ular vengriyaning “Debresen” klubini ikki marta bir xil 3:0 hisobida mag‘lub etishdi. Ronaldu bitta gol urdi, ammo Chempionlar ligasining o‘sha mavsumida boshqa gol ura olmadi.
Ser Aleks Fergyuson jamoasi Ispaniyaning “Vilyarreal”, Portugaliyaning “Benfika” va Fransiyaning “Lill” klublari bilan bir guruhda so‘nggi o‘rinni egalladi. Ingliz klubi bor-yo‘g‘i bitta g‘alabaga erishib, olti ochko jamg‘ardi va qo‘shimcha ko‘rsatkichlar bo‘yicha “Lill”ga uchinchi o‘rinni boy berdi. Ushbu guruh o‘yinlari zerikarli bo‘lib chiqdi, to‘rtta jamoa jami atigi 12 ta gol urishdi. “Vilyarreal” uchta gol urib, guruh g‘olibligini qo‘lga kiritdi.
“Manchester Yunayted” ham shuncha gol urgan bo‘lsa, “Lill” bir martagina gol urgan. Bu gol fransuzlarga mankunianliklarni mag‘lub etishi, keyin esa uchinchi o‘rin uchun kurashda ulardan oldinga o‘tishlari uchun yetarli bo‘ldi. Ronaldu guruh bosqichini golsiz o‘tkazdi va jamoa bilan birgalikda pley-offga chiqa olmadi.
2005/2006 yilgi mavsumda Chempionlar ligasining asosiy kashfiyoti
“Vilyarreal” Yevropaning eng nufuzli klub turnirida yarim finalga chiqishini kam odam tasavvur qilgan bo‘lar edi. Saralashda Manuel Pellegrini shogirdlari “Everton”dan ustun keldi (2:1, 2:1), keyin esa guruhda birinchi o‘rinni egalladi. Pley-offda “Vilyarreal” safardagi gol qoidasi evaziga ikki raqibdan o‘tdi. Avvaliga ispan klubi “Reynjers”ni (2:2, 1:1), keyin esa “Inter”ni (1:2, 1:0) turnirdan chiqarib yubordi.
“Vilyarreal” safida tajribali argentinaliklar Xuan Roman Rikelme va Xuan Pablo Sorin, urugvaylik to‘purar Diyego Forlan va bo‘lajak Yevropa chempioni Markos Senna to‘p tepgan. Himoyachi Rodolfo Arruabarrenani ham eslab o‘tish mumkin. U pley-offda ikkita gol urgan edi. Yarim finalda “Vilyarreal” “Arsenal”ga munosib qarshilik ko‘rsatdi, ammo bu yana bitta mo‘’jiza uchun yetarli bo‘lmadi.
Londonda Pellegrini jamoasi mag‘lub bo‘ldi (1:0) va bu natija javob o‘yinida imkoniyat qoldirdi. Oradan bir hafta o‘tib, jamoalar 0:0 hisobida durang o‘ynashdi. “Vilyarreal” Chempionlar ligasi finaliga bir qadam qolganda to‘xtagan bo‘lsa, ichki chempionatda atigi yettinchi o‘rinni egalladi.
Qaysi jamoa g‘olib chiqqan edi?
Bu "Barselona"ning mavsumi edi. Frank Raykard shogirdlari guruh bosqichini osonlik bilan yengib o‘tishdi - "Verder", "Udineze" va "Panatinaikos" bilan kvartetda birinchi o‘rin. Kataloniyaliklar mumkin bo‘lgan 18 ochkodan 16 ochko to‘plashdi va faqat ikkita gol o‘tkazib yuborishdi.
1/8 finalda kataloniyaliklar bir yil oldingi mag‘lubiyat uchun “Chelsi”dan o‘ch olishdi. Ispaniya klubi “Stemford Brij”da g‘alaba qozondi (2:1), “Kamp Nou”da esa jamoalar durang o‘ynadi – 1:1. Angliyada Samuyel Eto'O mehmonlarga g‘alaba keltirgan bo‘lsa, bungacha Tiago Motta va Jon Terri avtogol almashishdi. Ikki hafta o‘tib Ronaldinyo raqib darvozasini ishg‘ol qildi, "Chelsi" bunga penaltidan Frenk Lempardning goli bilan javob qaytardi.
“Barselona” ishtirokidagi chorak final va yarim final o‘yinlari oddiy bo‘lib chiqdi. Avvaliga kataloniyaliklar “Benfika”ni yengishdi (0:0, 2:0), keyin esa “Milan”ni mag‘lub etishdi (1:0, 0:0). Final Parijdagi “Stad de Frans” stadionida bo‘lib o‘tdi, u yerda “Arsenal” “ko‘k-anorranglilar”ni kutayotgandi.
London jamoasi shu paytgacha hech qachon Chempionlar ligasi chorak finalidan nariga o‘ta olmagan, ammo 2005/2006 yilgi mavsumda ular tarixdagi eng yaxshi natijani qayd etishgan. Final yo‘lida "Arsenal" gol o‘tkazib yubormasdan 10 o‘yindan iborat ajoyib seriyani davom ettirdi. Ulardan to‘rttasi guruh bosqichida, oltitasi pley-off bosqichida edi. Arsen Venger shogirdlari "Real Madrid" (1:0, 0:0), "Yuventus" (2:0, 0:0) va "Vilyarreal"ni (1:0, 0:0) hisoblarda yenggan.
Ammo bu sehrlarning barchasi finalda ish bermadi. Nominal mehmonlar o‘yin boshidayoq o‘n kishi bilan qoldi - norvegiyalik hakam Terje Xauge darvozabon Lemanni chetlatdi. Aytgancha, bu Chempionlar ligasi finallari tarixidagi birinchi to‘g‘ridan-to‘g‘ri qizil kartochka bo‘ldi. Jamoalar tanaffusga 1:0 hisobida "Arsenal" foydasida yo‘l olishdi. Birinchi bo‘lim tugashiga oz qolganda Tyerri Anrining uzatmasini Saul Kempbell boshi bilan darvozaga yo‘lladi. "Arsenal" so‘nggi daqiqalargacha chidadi.
Ikkinchi bo‘lim yakunida besh daqiqa ichida Eto‘O va Belletti to‘p kiritishdi, shundan so‘ng "Barsa" uchrashuvni g‘alabaga olib keldi.
Kim o‘sha mavsum eng yaxshi to‘purarga aylandi?
Andriy Shevchenko so‘nggi mavsumni "Chelsi"ga o‘tishdan oldin "Milan" libosida o‘tkazdi va Chempionlar ligasining eng yaxshi mergani unvoni uchun yetarlicha o‘ynadi. O‘sha mavsumda ukrainalik hujumchi to‘qqizta gol urdi.
Mavsum oxirida Shevchenko “Milan”ni “Chelsi”ga almashtirdi, biroq Angliyada Andrey yaxshi vaqt o‘tkazmadi. Ammo Italiya klubi 2006/2007 yilgi mavsumda Chempionlar ligasida g‘olib chiqdi.
