Londonning "Arsenal" klubi bu mavsumda chempionlikka eng asosiy da’vogarga aylangandi. Ammo bu yo‘lda katta mashaqqat mavjud. Xususan, klu mavsumning har bir ochko yo‘qotilgan bahslarida hakamlik sababli aziyat chekdi. To‘pchilarga so‘nggi yetkazilgan zarar "Brentford" bilan yuz berdi. "Arilar" tomonidan kiritilgan golda o‘yindan tashqari holat bor edi. Bu voqeadan keyin Angliya hakamlar ittifoqi raisi Xovard Uebb "Arsenal" bilan bog‘lanib, VAR'dagilar xato qilganini ta’kidladi va Li Meyson yo‘l qo‘ygan xato uchun jamoadan kechirib so‘radi.
Shuni ham aytish kerakki, Mikel Arteta jamoasi bu mavsum davomida birinchi marta noto‘g‘ri hakamlikdan aziyat chekayotgani yo‘q. Agarda hakamlik to‘g‘ri amalga oshirilganida, hozirda "Arsenal" uch ochkodan ko‘proq farq bilan yetakchilik qilayotgan bo‘lardi. Quyida to‘pchilar ochko yo‘qotgan boshqa o‘yinlardagi hakamlar yo‘l qo‘ygan xatolarga to‘xtalib o‘tamiz.
"Arsenal" va "Everton (0-1)
"Arsenal" oldingi turda "Everton" maydonida o‘zining mavsumdagi ikkinchi mag‘lubiyatini qabul qilib olgandi. Jeyms Tarkovski bosh bilan hisobni ochgach, to‘pchilar hujumga zo‘r berdi. Shunday harakatlarning birida "Arsenal" himoyachisi Gabriel raqib jarima maydoni ichida Nil Mope tomonidan ushlab qolinadi. Hakam ushbu vaziyatda qarama-qarshi tomonga jarima belgilaydi. Holatni VAR ko‘radi, ammo ular ham hech narsa yo‘qligini bildirishadi. Sobiq APL hakami Piter Uolton vaziyatni tahlil qilar ekan, BT Sport kanaliga, o‘shanda penalti berilishi kerak ekanini bildirdi. Natijada, "Arsenal" bir ochkosiz qoldi.
"Arsenal" va "Nyukasl" (0-0)
Bu o‘yinda ham Gabriel katta sahnaga chiqadi. 4 yanvar kuni bo‘lib o‘tgan bahsda himoyachi Den Bern tomonidan yiqitiladi. Ammo hakam va VAR penalti borligini inkor qilishadi. Vaziyat borasida Sky Sports'ning anonim muxbiri fikr bildirib, Mikel Arteta jamoasi penalti olishga loyiq bo‘lganini aytgandi.
"Arsenal" va "Sautgempton" (1-1)
To‘pchilar "Avliyolar" bilan durang qayd etgandi. Ammo Gabriel Jezus bilan bo‘lgan vaziyatda penalti berilganida, hisob 2-0 bo‘lgan bo‘lardi. Braziliyalik hujumchi raqib himoyachisi Chaleta-Sar tomonidan ushlab qolinadi. Ammo bahs hakami Robert Jons bu yerda yetarlicha kontakt bo‘lmaganini bildiradi. Biroq, ayni turdagi "qoidabuzarlik" uchun "Chelsi" hujumchisi Armando Broya "MYU"ga qarshi bahsda penalti bilan mukofotlangan. Sobiq hakam Mark Xelsi fikriga ko‘ra, "Arsenal"ga penalti bermay, hakam jamoaning ikki ochko yo‘qotishiga sabab bo‘lgan.
"Arsenal" va "MYU" (1-3)
"Manchester Yunayted" sentyabr oyida "Arsenal"ning mavsumdagi ilk mag‘lubiyatiga sabab bo‘ladi. Ammo o‘sha o‘yindagi Gabriel Martinellining goli hisobga olinganida, natija butunlay boshqacha bo‘lishi mumkin edi. VAR goldan muammo topa olmaydi. Ammo hujumning rivojlanish fazasida Martin Edegor Kristian Eriksendan to‘pni olib qo‘yishda qoida buzgan bo‘lib chiqadi. Alsida u yerda minimal kontakt yuz bergan va qoida buzarlik deb topishga arzimasdi. Ushbu vaziyatni keyinchalik APL xato ekanini tan olgan.
ISMATOV J.
