“Paxtakor-79” jamoasi 2022 yilgi mavsum yakuniga ko‘ra Birinchi ligada 3-pog‘onani band etgandi.

Namangan viloyatining Uychi tumani nomidan musobaqada ishtirok etib kelayotgan jamoa 2023 yildan boshlab o‘z lokasiyasini o‘zgartirdi. Yanvar oyida yuridik shaxsning umumiy yig‘ilishi Angren shahriga ko‘chib o‘tish yuzasidan qaror chiqardi va jamoa “Angren Paxtakor-79” sifatida ro‘yxatdan o‘tkazildi. Bu borada ta’sis hujjatlariga tegishli o‘zgartirishlar kiritib bo‘lingan. Liga musobaqa jadvalida jamoa “Paxtakor-79” nomi bilan aks etadi, qolgan hujjatlarda esa u "Angren" jamoasi sifatida yuritiladi.

2019 yilda tashkil etilgan “Paxtakor-79” bugun o‘z moliyalashtirish manbaasi, tasdiqlangan rivojlanish rejasi, bosh homiy bilan tuzilgan shartnoma, shuningdek, jamoa uy uchrashuvlarini o‘tkazadigan stadioni bo‘yicha hujjatlarni Ligaga taqdim etdi. Endilikda jamoa uy uchrashuvlarini Angren shahridagi “Markaziy” stadionda o‘tkazadi. Mart oyiga qadar Liga mutaxassislari stadiondagi holat bilan tanishadi.

Ma’’lumot uchun, “Paxtakor-79” jamoasi ta’sischisi sifatida ganalik Kelvin Kvasi Logo faoliyat olib bormoqda.