Zamonaviy futbolda YECHL bosh sovrini, asosan boy va katta klublar tomonidan qo‘lga kiritiladi. Ammo bu katta futbolchilar ham unga ega chiqadi degani emas. Yillar davomida ba’zi super yulduzlar chempionlar ligasini yutishga qiynalishgan va buni udda qila olishmagan. Quyida shunday futbolchilarni yig‘dik.
Darvozabon: Janluiji Buffon
UYEFA tarixida yil futbolchisi nomini olgan yagona darvozabon, "Yuventus" bilan YECHLning 3 ta finalini boy bergan. U 2003 yilda sovringa eng yaqin keladi. Ammo "Milan" baribir g‘olib bo‘lgandi. Oradan shuncha vaqt o‘tishiga qaramay, Buffon hozir ham futbol o‘ynamoqda. 45 yoshli qahramonimiz ro‘yxatdagi yagona aktiv futbolchidir.
Chap qanot himoyachisi: Lilian Tyuram
2003 yilgi finalni mag‘lubiyat bilan yakunlagan yana bir futbolchi Tyuramdir. U o‘z davrida "Monako", "Parma", "Yuventus" va "Barselona"ning eng barqaror vakili edi. Tyuram Fransiya terma jamoasi bilan katta zafar quchgandir. Ammo klublar miqyosida unga YECHLni yutish nasib etmagan.
Markaziy himoyachi: Kannavaro
Klassik italyan himoyachisi ko‘pchilik tomonidan e’tirof etiladi. Kannavaro "Oltin to‘p" sovrinini qo‘lga kiritgan yagona himoyachi hamdir. U "Inter" safida 2003 yilgi yarim finalda "Milan"ga imkoniyatni boy bergan va YECHLdan mahrum bo‘lgan.
Markaziy himoyachi: Loran Blan
Aslidaku, Jorjo Kyellini varianti ham bor edi. Biroq, biz himoyachilarni faqat "Yuventus"dan tuzib chiqishni istamadik. Xalqaro maydonda Blan Fransiya bilan Jahon va Yevropa chempioni bo‘ladi. Ammo klub orqali YECHLga erishish unga nasib etmadi. Blan YECHL turnirida "MYU" bilan 2002 yilda yarim finalga qadar yetib bora olgan xolos.
Chap qanot himoyachisi: Janluka Zambrotta
Zambrottaning faoliyati Tyuramnikini akslantirgandi. U ham 2003 yilda YECHL finaliga "keksa sinyora" bilan yo‘l oladi. 2006 yilda esa "Barselona"ga ketadi. Ammo katalon klubi ham Zambrottaga oliy maqsadiga yetishida yordam bera olmagan.
Tayanchda: Lotar Matteus
Himoya va maydon markazidagi futbolchilarga solishtiradigan bo‘lsak, Matteus YECHLga eng yaqin kelgan vakil edi. Ammo uning "Bavariya"si 1999 yilda "Manchester Yunayted" tomonidan finalda tor-mor keltirilgandi.
Markaziy yarim himoya: Mixael Ballak
O‘ksiklik Ballak uchun ham begona his emas. Negaki, uning jamoasi, "Bayer 04" YECHL finalini boy beradi. Ha, u keyinchalik "Bavariya"ga o‘tib Germaniyada zafarlar qozonadi. Ammo "shalpangquloq kubok" baribir armonligicha qolaverdi. 2008 yilgi finalda u "Chelsi" bilan ham bunga erisha olmaydi.
Markaziy yarim himoyachi: Pavel Nedved
Nedved 2003 yilgi "Yuventus"da fantastik darajada bo‘lgan. U Zidan o‘rnini bosadi va YECHLda Zayniddin va uning yangi jamoasi bo‘lgan "Real"ni musobaqadan chiqarib yuboradi. Biroq, "Milan" uni ham qon qaqshatgandi.
Hujumkor yarim himoyachi: Franchesko Totti
Ha, Totti borasida ham ikkilanish kuchli edi. Chunki bu o‘ringa undan tashqari Bergkamp, Bajo, Ibragimovich kabi nomzodlar bor edi. Biroq, Totti hammasidan ham ustunroq jihatlarga ega bo‘lgan.
Hujumchi: Gabriel Batistuta
Biz APLda raqiblarga dahshat solgan futbolchini tanlamasak bo‘lmasdi. Chunki uning to‘purarlik qobiliyatini e’tirof etmaslik mumkin emas. "Manchester Yunayted" va "Arsenal"ning o‘tmishdagi futbolchilari buni juda yaxshi biladi.
Hujumchi: Ronaldo
Ha, katta armon! U shundayki, "Il Fenomeno" hech qachon YECHL bosh sovrinini boshi uzra baland ko‘tarmagan. Biroq, u har doim bu turnirda urgan "Old Trafford"dagi xet-trik gollari bilan yodimizda qoladi.
ISMATOV J.
