"Chelsi" hujumchisi Kay Xavers bugun, 15 fevral kuni Toshkent vaqti bilan soat 01:00da boshlanadigan Chempionlar ligasining 1/8 finali doirasidagi Dortmundning “Borussiya” jamoasiga qarshi o‘yindan oldingi fikrlari bilan o‘rtoqlashdi.

"Joriy mavsum biz kutganimizdek oson kechmadi. Endi bor e’tiborimizni Chempionlar ligasiga qaratamiz, chunki biz “turnir jamoasi” ekanligimizni va bu mavsumda ko‘p yutuqlarga erishishimiz mumkinligini bilamiz.

Chempionlar ligasi - bu o‘ziga xos turnir, nima bo‘lishini hech qachon bilib bo‘lmaydi. Biz 2020/21 yilda murabbiylarni almashtirganimizda va Chempionlar ligasi finalida hayratlanarli darajada o‘ynaganimizda, biz Premyer-ligada 10-o‘rinda edik. Bu yerda hamma narsa juda tez ketmoqda. O‘ylaymanki, "Borussiya" o‘yini ajoyib bo‘ladi va ikkala jamoada ham g‘alaba qozonish uchun yaxshi imkoniyat bor. Shuning uchun men yakunda nima bo‘lishini ko‘rishni juda xohlayman", - dedi Xavers "Chelsi" klubi rasmiy saytiga.