L'Equipe xabariga ko‘ra, hujumchi Lionel Messi yozda "PSJ" bilan shartnomasini uzaytirish borasida ikkilanib bormoqda.

15 fevral, chorshanba kuni 35 yoshli argentinalik futbolchining otasi va agenti va Parij klubi rahbariyati o‘rtasida uchrashuv bo‘lib o‘tdi, biroq tomonlar kelishuvga erisha olishmadi. Bu muzokaralar bir oydan ko‘proq vaqt oldin rejalashtirilgan edi. Yaqin kunlarda yangi uchrashuv bo‘lib o‘tadi.

Manbaga ko‘ra, Messi "PSJ"ni tark etishning ikkita variantini ko‘rib chiqmoqda: "Inter Mayami"ga o‘tish yoki Parijga o‘tishdan oldin butun faoliyatini o‘tkazgan "Barselona"ga qaytish.

Messining amaldagi shartnomasi 2023 yilning yoziga qadar mo‘ljallangan. Joriy mavsumda u "PSJ" safida 26 ta o‘yinda maydonga tushib, 15 ta gol va 14 ta golli uzatmani amalga oshirdi.