L'Equipe хабарига кўра, ҳужумчи Лионель Месси ёзда "ПСЖ" билан шартномасини узайтириш борасида иккиланиб бормоқда.
15 февраль, чоршанба куни 35 ёшли аргентиналик футболчининг отаси ва агенти ва Париж клуби раҳбарияти ўртасида учрашув бўлиб ўтди, бироқ томонлар келишувга эриша олишмади. Бу музокаралар бир ойдан кўпроқ вақт олдин режалаштирилган эди. Яқин кунларда янги учрашув бўлиб ўтади.
Манбага кўра, Месси "ПСЖ"ни тарк этишнинг иккита вариантини кўриб чиқмоқда: "Интер Майами"га ўтиш ёки Парижга ўтишдан олдин бутун фаолиятини ўтказган "Барселона"га қайтиш.
Мессининг амалдаги шартномаси 2023 йилнинг ёзига қадар мўлжалланган. Жорий мавсумда у "ПСЖ" сафида 26 та ўйинда майдонга тушиб, 15 та гол ва 14 та голли узатмани амалга оширди.
