Avval xabar berganimizdek, yangi mavsumga tayyorgarlik ko‘rish uchun yanvar oyida Turkiyaga yo‘l olgan jamoamiz yig‘inlar doirasida bugun oxirgi nazorat uchrashuvlarini yakunladi.

Kunning birinchi yarmida Rossiyaning "Krilya Sovetov" klubi mag‘lub etilgan bo‘lsa (3:2), kechga yaqin ikkinchi o‘rtoqlik o‘yinida Qozog‘iston Premyer ligasining vakili "Jetisu" jamoasi bilan bo‘lib o‘tgan uchrashuvda ham farg‘onaliklar ishonchli g‘alabaga erishdilar — 2:0.

Birinchi bo‘lim oxirida qozog‘istonlik futbolchilar darvozasi tomon belgilangan 11-metrli jarimani legionerimiz Toma Tabatadze qoyilmaqom tarzda bajarib, uchrashuvda hisobni ochgan bo‘lsa, ikkinchi bo‘limda farg‘onaliklar safiga yangi kelib qo‘shilgan futbolchi Nurillo To‘xtasinov esa "Jetisu" darvozasiga navbatdagi to‘pni kiritib, hisobni 2:0 ko‘rinishiga keltirdi. Mazkur natija o‘yin oxirigacha o‘zgarishsiz qoldi.

Nazorat uchrashuvi
"Neftchi" - "Jetisu" - 2:0
Gollar: Toma Tabatadze, 1:0 (41-pen.), Nurillo To‘xtasinov, 80 (2:0)
"Neftchi": Vladimir Nazarov, Muhsin Ubaydullayev, Zoir Jo‘raboyev, Andrey Mishenko, Abbos G‘ulomov (G‘ulomxaydar G‘ulomov 81), Mirzohid G‘ofurov, Nurillo To‘xtasinov, Diyor Turopov, Yuriy Batyushin, Toma Tabatadze, Ulug‘bek Hoshimov (Izzatilla Abdullayev 81)
Bosh murabbiy: V.Levchenko

Shu bilan "Neftchi"ning yanvar oyidan boshlangan Turkiya yig‘inlaridagi oxirgi bahslari ketma-ket ishonchli g‘alabalar bilan o‘z nihoyasiga yetdi.

"Neftchi" PFK matbuot xizmati.