Joriy mavsumda Qozog‘iston chempionatida ishtirok etayotgan Toshkentning «Humo» xokkey klubi pley-off bosqichidan o‘rin olgan dastlabki o‘yinni o‘tkazdi. Toshkentliklar "Gornyak" klubiga qarshi dastlabki o‘yinda qiyin g‘alabaga erishishdi.

Bahsning birinchi bo‘limida qozog‘istonliklar hisobni ochishgan bo‘lsa, ikkinchi taymda vakillarimiz Artyom Valeevning goli evaziga hisobni tenglashtirishdi.

Uchinchi davrda hisob o‘zgarmagani uchun navbat overtaymga berildi. Uning 14-daqiqasi "Gornyak" xokkeychisi xavfli o‘yin uchun 4 daqiqaga maydondan chetlatildi. "Humo" bundan unumli foydalanib, g‘alabani o‘z tomoniga og‘dirdi. G‘alaba to‘pi muallifi ham Artyom Valeev bo‘ldi.

Shu tariqa, "Humo" pley-offda dastlabki g‘alabaga erishdi. Chorak final bosqichi jamoalardan biri 4 marta g‘alaba qozongunga qadar o‘yinlar o‘tkaziladi. Ikkinchi uchrashuv ertaga — 17 fevral kuni bo‘lib o‘tadi. Keyingi ikkita bahs esa 21 va 22 fevral kunlari Rudniy shahrida bo‘lib o‘tadi.