Germaniya chempionatining 21-turi doirasida «Bavariya» Myonxengladbax shahrida «Borussiya» klubi mehmoni bo‘lib, imkoniyatni boy berdi.
Bahsning 8-daqiqasida myunxenliklar himoyachisi Dayo Upamekano darvozabon bilan yakkama-yakka vaziyatga chiqayotgan Pleani ortidan tepib yiqitdi. Natijada hakam uni maydondan chetlatdi va "Bavariya" o‘yin boshidayoq bir kishi kam bo‘lib qoldi.
"Borussiya" esa mazkur ustunlikdan unumli foydalanib, g‘alabani qo‘lga kiritdi. Shtindl 13-daqiqada hisobni ochgan bo‘lsa, 35-daqiqada Shupo-Moting muvozanatni tikladi.
"Gladbax" ikkinchi bo‘limda g‘alabani o‘z tomoniga og‘dirdi. Taym boshida Xofmann, o‘yin so‘ngida Tyuram "Bavariya" darvozasiga bittadan gol urishdi. Myunxenliklar esa ikkinchi taymga qo‘shilgan vaqtda bitta javob to‘pini kiritishdi.
Shu tariqa, "Bavariya" ushbu jamoaga qarshi so‘nggi 5ta o‘yinda g‘alaba qozona olmayapti — 3 mag‘lubiyat va 2 durang.
"Borussiya Myonxengladbax" ushbu g‘alaba tufayli o‘z ochkolarini 29 taga yetkazib, 8-o‘ringa ko‘tarilib oldi. "Union Berlin" ushbu turda g‘alabaga erishsa, ochkolar bo‘yicha "Bavariya"dan o‘tib ketib, peshqadamga aylanish uchun imkoniyat mavjud. Shuningdek, "Borussiya Dortmund" myunxenliklarga yetib olishi mumkin.
Germaniya chempionati, 21-tur
Borussiya M – Bavariya 3:2 (1:1, 2:1)
Gollar: 1:0 – 13 Shtindl, 1:1 – 35 Shupo-Moting, 2:1 – 55 Xofmann, 3:1 – 84 Tyuram, 3:2 – 90 Tel.
Borussiya M – Omlin, Layner, Elvedi, Itakura, Bensebayni, Shtindl (Tyuram, 74), Kramer (Vaygl, 57; Yanchke, 90), Xofmann, Volf (Xerrmann, 90), Kone, Plea (Noyxaus, 74).
Bavariya – Zommer, Blind, Upamekano, Pavar, Goretska (de Ligt, 62), Kimmix, Gravenberx (Musiala, 46), Gnabri (Sane, 46), Shupo-Moting (Tel, 62), Myuller (Joau Kanselu, 16), Devis.
Ogohlantirishlar: Goretska (37).
Chetlatish: Upamekano (8).
