«Nasaf» Qatarda Saudiya Arabistonining «Al-SHabab» klubiga qarshi bahsda umidlarni oqlamadi - 0:2 va futbolimiz OCHL yakuniy qismida yana oddiy tomoshabin maqomida. Afsus.
Binobarin, futbolimiz «Nasaf» timsolida loaqal yana bir raundda ishtirokchi sifatida qolishini istagandik...
Tan olish kerak, Doxadagi «Al-Janub» stadionidagi o‘yinda Saudiya jamoasi har tomonlama kuchliroq ko‘rindi. Deylik, arablar Abduvohid Ne’matov darvozasi tomon 18 marta zarba yo‘llashdi va 7ta urinishlari aniq chiqdi. «Ajdarlar»da esa bu ko‘rsatkichlar 8/2ni tashkil etdi. Shuning o‘zi «Shabab» katta ustunlikka erishganini bildirib turibdi. Aslida «ajdarlar» o‘yinni yomon boshlashmadi, ammo 12-daqiqada raqibning markaz bo‘ylab amalga oshirgan hujumiga talab darajasida e’tibor qaratilmagani ortidan yuzaga kelgan rikoshet-gol umumiy manzarini keskin buzib tashladi. Oddiy aytganda, Husayn al Qahtoniy urgan tezkor gol «Shabab»ga xotirjamlik bag‘ishladi, «Nasaf»ga esa shoshma-shosharlik. Deylik, Oybek Bozorov qulay vaziyatda mo‘ljaldan adashdi.
Ikkinchi bo‘limning taxminan 10-daqiqasiga kelib, argentinalik Ever Banega «Al-SHabab» xotirjamligini ikki hissa mustahkamladi. Albatta, Ro‘ziqul Berdiyev 0:2dan keyin tarkibda o‘zgarishlarga qo‘l urdi, ammo buning samarasi sezilmadi. Ayniqsa, maydon markazida o‘yinni boshqaradigan ijrochi topilmadi. Xullas, murabbiy o‘yindan keyin aytganidek, «Nasaf» bunday darajadagi o‘yinga hali tayyor emas ekan.
* «Al-SHabab» tarkibning umumiy bahosi bo‘yicha OCHLning eng qimmatbaho jamoasidir (39,8 million yevro). «Nasaf» esa 9,3 mln. yevroga teng umumiy summa bilan 1/8 finalchilar orasida 10-ko‘rsatkichga ega.
«Al-SHabab»ning eng qimmatbaho futbolchisi: Aaron Bupenza (8 mln. yevro)
«Nasaf»ning eng qimmatbaho futbolchisi: Husayn Norchayev (900 ming yevro)
* «Nasaf» OCHL guruh bosqichidagi 2ta g‘alaba va 3ta durang ortidan 130 ming dollar ishlagandi. Agar «Al-SHabab»ni yengganida, OFK tomonidan yana 100 ming dollar mukofot puli olardi.
