«Насаф» Қатарда Саудия Арабистонининг «Ал-Шабаб» клубига қарши баҳсда умидларни оқламади - 0:2 ва футболимиз ОЧЛ якуний қисмида яна оддий томошабин мақомида. Афсус.
Бинобарин, футболимиз «Насаф» тимсолида лоақал яна бир раундда иштирокчи сифатида қолишини истагандик...
Тан олиш керак, Дохадаги «Ал-Жануб» стадионидаги ўйинда Саудия жамоаси ҳар томонлама кучлироқ кўринди. Дейлик, араблар Абдувоҳид Неъматов дарвозаси томон 18 марта зарба йўллашди ва 7та уринишлари аниқ чиқди. «Аждарлар»да эса бу кўрсаткичлар 8/2ни ташкил этди. Шунинг ўзи «Шабаб» катта устунликка эришганини билдириб турибди. Аслида «аждарлар» ўйинни ёмон бошлашмади, аммо 12-дақиқада рақибнинг марказ бўйлаб амалга оширган ҳужумига талаб даражасида эътибор қаратилмагани ортидан юзага келган рикошет-гол умумий манзарини кескин бузиб ташлади. Оддий айтганда, Ҳусайн ал Қаҳтоний урган тезкор гол «Шабаб»га хотиржамлик бағишлади, «Насаф»га эса шошма-шошарлик. Дейлик, Ойбек Бозоров қулай вазиятда мўлжалдан адашди.
Иккинчи бўлимнинг тахминан 10-дақиқасига келиб, аргентиналик Эвер Банега «Ал-Шабаб» хотиржамлигини икки ҳисса мустаҳкамлади. Албатта, Рўзиқул Бердиев 0:2дан кейин таркибда ўзгаришларга қўл урди, аммо бунинг самараси сезилмади. Айниқса, майдон марказида ўйинни бошқарадиган ижрочи топилмади. Хуллас, мураббий ўйиндан кейин айтганидек, «Насаф» бундай даражадаги ўйинга ҳали тайёр эмас экан.
* «Ал-Шабаб» таркибнинг умумий баҳоси бўйича ОЧЛнинг энг қимматбаҳо жамоасидир (39,8 миллион евро). «Насаф» эса 9,3 млн. еврога тенг умумий сумма билан 1/8 финалчилар орасида 10-кўрсаткичга эга.
«Ал-Шабаб»нинг энг қимматбаҳо футболчиси: Аарон Бупенза (8 млн. евро)
«Насаф»нинг энг қимматбаҳо футболчиси: Ҳусайн Норчаев (900 минг евро)
* «Насаф» ОЧЛ гуруҳ босқичидаги 2та ғалаба ва 3та дуранг ортидан 130 минг доллар ишлаганди. Агар «Ал-Шабаб»ни енгганида, ОФК томонидан яна 100 минг доллар мукофот пули оларди.
