Bugun O‘zbekiston Milliy olimpiya qo‘mitasi anjumanlar zalida sobiq hakam, nazoratchi va murabbiy Sayfiddin Ermatovning tavallud ayyomi bilan tabriklash uchun bir qator futbol mutaxassislari jamlanishdi. Tadbir davomida S.Ermatovning faoliyati davomida esda qolgan holatlar yig‘ilganlar tomonidan eslandi. Yuz bergan qiziq voqealar va yoqimli lahzalar tadbirga kelganlarga aytib berildi.

Ma’lumot o‘rnida, Sayfiddin Ermatov butun faoliyati davomida xalq orasida «Chig‘atoy» futbol maktabi nomi bilan mashhur bo‘lgan Respublika futbol bo‘yicha sport mahoratini oshirish oliy maktabida murabbiy bo‘lib ishlagan. Tarkibida Server Jeparov, Shuhrat Mirxoldirshoyev, Yaroslav Krushelnitskiy, Yuriy Nikitov kabi futbolchilar bo‘lgan O‘zbekiston yoshlar terma jamoasiga bosh murabbiylik qilgan.

Shuningdek, tajribali mutaxassis ko‘p yillar davomida futbol hakami va inspektor sifatida ham samarali ishlagan. U o‘z faoliyati davomida ko‘plab iqtidorli yosh hakamlarni tarbiyalashga o‘zining uzviy hissasini qo‘shdi. Uning shogirdlari orasida FIFA referisi, jahon chempionatlari rekordchisi bosh hakam Ravshan Ermatov, Abduhamidullo Rasulov kabi o‘z sohasining taniqli mutaxassislarini uchratish mumkin.

Tadbir yakunida Sayfiddin Ermatov ko‘rsatilayotgan e’tibor uchun chuqur minnatdorlik bildirib, bundan keyin ham mamlakatimiz futboli rivojiga ko‘mak berishga tayyor ekanini ta’kidladi.