Bugun OKMK Olmaliqda Tojikistonning «Xo‘jand» jamoasi bilan nazorat o‘yinida ishtirok etdi. Yopiq eshiklar ostida kechgan uchrashuvda olmaliqliklar yirik hisobda g‘alabani tantana qilishdi.

Uchrashuv keskin kurashlar va shiddatli hujumlar ostida o‘tdi. O‘yin boshida jamoamiz tezkor hujum uyushtirdi va 2-daqiqada Xurshid G‘iyosov hisobni ochdi. Uchrashuv davomida yana ko‘plab ajoyib imkoniyatlar yuzaga keldi. Mirjamol Qosimovning uzoq masofadan yo‘llagan xavfli zarbasini raqib darvozaboni qaytargan bo‘lsa, 29-daqiqada Xurshid G‘iyosovning zargarona zarbasi himoyachiga tegib darvozadan o‘rin oldi. 32-daqiqada raqiblar penalti ishlashdi va Botirali Ergashev qo‘riqlayotgan darvozani ishg‘ol qila olishmadi. Shuningdek jamoamiz to‘p nazoratida dominantlik qilib navbatdagi hujumda hisobni yiriklashtirdi. Shohruh Gadoyevning ajoyib uzatmasini Ruben Sanches darvozaga joylab qo‘ydi.

Ikkinchi bo‘limda tarkib butunlay almashtirildi va to‘p bilan o‘yin nazorati yanada kuchaytirildi. Qator hujumlar samarali yakunlanmadi. Shuningdek tablodagi hisob uchrashuv yakuniga qadar saqlanib qolindi.

Nazorat o‘yin.
22 fevral, chorshanba
OKMK – «Xo‘jand» (Tojikiston) 3:0
Gollar: G‘iyosov (2), avtogol (29), Sanches (36)
OKMK - (4-3-3) Ergashev – Ahmadaliyev, Rahmonov, Ismoilov, Komilov – Haqnazariy, Qosimov, Abdullayev – Gadoyev, Sanches, G‘iyosov.
Ikkinchi bo‘limda maydonga tushganlar – Rahimov, Denisov, Sunnatov, Muhammad ali Salem, Begimov – Hasanov, Rustamov, Ermatov – Bashriddinov, Rukhadze, Mirahmadov.