"Chelsi" yarim himoyachisi Enso Fernandes jamoaga ishonchini yo‘qotmaganini aytdi. Eslatib o‘tamiz, argentinalik futbolchi "ko‘klar" safida 4 ta o‘yin o‘tkazishga muvaffaq bo‘lgan, unda Grem Potter shogirdlari ikki bor durang o‘ynab, ikki bor mag‘lub bo‘lishgan.
“Men har doim “Chelsi”ga ishonaman, har bir o‘yinda g‘alaba qozonishga va professional darajada o‘sishga harakat qilaman. Asosiy maqsad - sovrinlarni yutish va futboldan zavq olish”, - deya Fernandesning so‘zlaridan iqtibos keltiradi Chelsi rasmiy sayti.
Qishki transfer oynasining so‘nggi kunida Enso "Stemford Brij"ga ko‘chib o‘tdi. Kelishuv 121 million yevroni tashkil etdi va bu argentinalikni Angliya Premyer-ligasi tarixidagi eng qimmat futbolchiga aylantirdi.