"Manchester Yunayted" safida ko‘plab katta nomlar harakat qilgan. 1992 yilda APL tashkil topganidan buyon bu jarayon yanada yaqqon ko‘rinish berdi. Quyida "qizil iblislar" safida eng ko‘p maydonga tushgan futbolchilarni o‘z pozisiyasiga ko‘ra saralab chiqamiz.
Darvozabon: David De Xea
Ispaniyalik posbon klubning eng ko‘p xizmat qilgan vakiliga aylangandi. U 400 ta uchrashuvda maydonga tushishga muvaffaq bo‘lgan. De Xeaning so‘nggi bahsi "MYU"ga "Lester" ustidan g‘alaba qozonishga yordam berdi.
Chap qanot himoyachisi – Denis Irvin
Yetti marta APL g‘olibligiga erishgan Irvin, klub safida 296 marta harakat qilishga erishgandi. Bu borada unga eng yaqini 273 ta o‘yin bilan Patris Evra.
O‘ng qanot himoyachisi – Gari Nevill
Sobiq ingliz futbolchisi "MYU" bilan ligada 398 ta o‘yin o‘tkazgan. Nevill Angliyaning eng yaxshi himoyachisi sifatida e’tirof etiladi. Negaki, u jamoasi bilan sakkiz bor chempionlikni nishonlagan.
Markaziy himoyachi – Rio Ferdinand
Ferdinand "MYU" tarixidagi eng yaxshi markaziy himoyachi va shunga yarasha ko‘p o‘yinlarda ishtirok etgan. Uning APLdagi o‘yinlar soni 312 taga tengdir. Sobiq futbolchi, shuningdek, "Vest Xem" va "Lids" sharafini ham himoya qilgan.
Markaziy himoyachi – Jon O'Shi
Yarim himoyachi, qanot himoyachisi va markaziy mudofaa yuragi – O'Shi jamoasi uchun eng universal futbolchi edi. Irlandiyalik 257 ta bahsda klubga xizmat qiladi. U bu borada Vidich, Braun va Silvestrlarni ortda qoldirgan.
O‘ng qanot yarim himoyachisi: Devid Bekxem
Jarima zarbalari ustasi bo‘lgan afsona, ramziy terma jamoaning o‘ng qanotidan o‘rin oldi. Vinger APLda "qizil iblislar" bilan birgalikda jami 264 ta bahsda maydonga tushgan. Keyinchalik uning manzili "Real" bo‘lgandi.
Markaziy yarim himoyachi – Pol Skoulz
"MYU" tarixidagi eng ko‘p maydonga tushgan futbolchilar ichida ikkinchi o‘rinni Skoulz egallaydi. U 1993 yildan 2011 yilga qadar jami 18 yil jamoasi uchun 466 ta o‘yin o‘tkazgandi.
Markaziy yarim himoyachi – Roy Kin
Skoulz bilan maydon markazida Roy Kin harakat qilgan. U jami 326 bahsda maydonga tushgan bo‘lib, 33 ta golga muallif bo‘ladi. 2005 yilda Kin jamoani tark etib, "Seltik"ka yo‘l oladi.
Chap qanot yarim himoyachisi – Rayan Giggz
Giggz bu jamoaga eng uzoq xizmat qilgan futbolchidir. U APL erasida 13 marta g‘alaba qozongan yagona vakil sanaladi. Klubning 632 ta bahsi, aynan uelslik afsona ishtirokida kechadi.
Hujumchi – Ole Gunar Sulsher
"Go‘dak yuzli qotil" APLda 235 ta o‘yin o‘tkazadi. Shulardan 84 tasini zaxira o‘rindig‘idan boshlangandi. Sulsher "MYU"ni uch yil davomida boshqargan.
Hujumchi – Ueyn Runi
Klubning rekordchi to‘purari 393 ta o‘yinda 183 ta golga mualliflik qildi. Runi jamoani beshta APL tituli yutishida o‘z hissasini qo‘shadi. U "MYU"ni eng yaxshi hujumchi sifatida tark etgandi.
ISMATOV J.
