Londonning "Chelsi" klubi murabbiylari shtabi jamoaning asosiy markaziy himoyachisi Tiago Silva Dortmundning "Borussiya" jamoasiga qarshi Chempionlar ligasining 1/8 finali javob o‘yinida maydonga tushmasligidan jiddiy xavotirda.
Eslatib o‘tamiz, yakshanba kuni bo‘lib o‘tgan "Tottenxem"ga qarshi derbida Silva tizzasidan jarohat olib, uchrashuv boshida almashtirilgandi.
The Times nashri xabariga ko‘ra, tibbiyot xulosasi natijalariga ko‘ra, braziliyalik futbolchi kamida bir hafta o‘tkazib yuborishga majbur bo‘ladi.
"Chelsi" Dortmundda "Borussiya"ga qarshi o‘tkazilgan dastlabki o‘yinda 0:1 hisobida imkoniyatni boy bergandi. Javob o‘yini 8 mart kuni Toshkent vaqti bilan 01:00 da "Stemford Brij"da bo‘lib o‘tishi rejalashtirilgan.
