"Inter" himoyachisi Milan Shkrinyar klub bilan shartnomasi shu yozda yakunlanadigan A Seriyaning eng qimmat futbolchisiga aylandi. Reytingni Transfermarkt portali taqdim etdi.

Shu tariqa, 28 yoshli slovakiyalikning narxi 60 million yevroga baholanmoqda. Avvalroq Shkrinyar butun dunyo futbolidagi yozning eng qimmat erkin agenti ekanligi xabar berilgandi.

Italiya klublarining boshqa futbolchilariga qaytsak. Ikkinchi o‘rinda 25 million yevroga baholangan “Yuventus”ning 27 yoshli markaziy yarim himoyachisi Adriyen Rabyo. Uchinchi o‘rinda “Roma” hujumchisi Andrea Belotti – 29 yoshli futbolchining narxi 15 million yevroga baholanmoqda.

Kuchli beshlikka “Inter”dan Stefan de Vrey 15 million yevro va “Yuventus”ning argentinalik faxriysi Anxel di Mariya – 35 yoshli vinger, 10 million yevroga kirgan.