"Manchester Yunayted" bosh murabbiyi Erik ten Xag o‘z shogirdlarining Angliya kubogi 1/8 finalida "Vest Xem" ustidan qozonilgan g‘alabadan (3:1) keyingi fikrlari bilan o‘rtoqlashdi. Uchrashuvning 77-daqiqasiga kelib "mankunianliklar" 0:1 hisobida ortda borishayotgandi, ammo qolgan vaqtlarda uchta gol urishga muvaffaq bo‘lishdi.
"Bu oson emas edi. Bayramdan keyin oddiy ishga qaytish oson emas, lekin biz g‘alaba qozonish yo‘lini topdik.
Menga eng muhimi bu jamoaning chidamliligi va g‘alaba qozonishimizga bo‘lgan ishonchi yoqdi. Bu nafaqat maydonda, balki zaxira o‘rindig‘ida ham ajoyib xarakterning namoyonidir. Ular bir-birlarini qo‘llab-quvvatlaydilar, bir-biriga kuch bag‘ishlaydilar va birgalikda to‘g‘ri impuls yaratadilar. Umid qilamanki, bu davom etadi, chunki bizga yaxshi ruh kerak.
O‘tkazib yuborilgan goldan keyin g‘alabaga ishondimmi? Men har doim g‘alaba qozonishimiz mumkinligini his qilganman. Bu o‘yindan, xotirjamligimizdan bilindi - vahima yo‘q! Kazemironing bekor qilingan goli bizga biroz omadsizlik olib keldi, bu gol o‘yindan tashqari holat tufayli bekor qilindi, ammo keyin ko‘proq gol urish uchun imkoniyatlar topdik.
Biz qo‘shimcha vaqtdan qochdik va bu jamoani formada ushlab turishga yordam berdi. Yana 30 daqiqa o‘ynashimiz shart emasligidan xursandman, chunki to‘rt kundan keyin yana bir o‘yinimiz bor. Biz o‘yindan o‘yinga o‘tamiz va keyingisi eng muhimi.
Tribunaning qo‘llab-quvvatlashi? Muxlislarimiz bilan hamjihatmiz, bu g‘alabalarni birgalikda yaratamiz. Lekin buni bizdan boshlash kerak, jamoa kuch ko‘rsatishi va uchrashuvlarda ustunlik qilishi kerak. Stadion va muxlislarimiz esa bu energiyani ko‘paytirib, futbolchilarga qaytaradilar. Demak, bu katta farq qiladi" - dedi Ten Xag o‘yindan keyingi matbuot anjumanida.
