Bugun jamoa qarorgohida «Bunyodkor» futbol klubi direktori Sherzod Haqberdiyev yangi mavsum oldidan asosiy tarkib a’zolari bilan uchrashdi. Uchrashuvda yangi mavsumga tayyorgarlik, amalga oshirilgan ishlar, tashkiliy masalalar haqida so‘z bordi. Tadbir yakunida jamoaga qo‘shilgan futbolchilarga yangi mavsum uchun liboslar topshirildi.

Sherzod Murodovich tadbir avvalida jamoa a’zolariga «Bunyodkor» futbol klubi prezidenti Mehriddin Abdullayevning so‘zlarini yetkazar ekan, rahbarimiz doimo jamoa bilan hamnafasligini ta’kidladi. O‘z navbatida futbolchilar nomidan so‘zga chiqqan sardorimiz Davronjon Ergashev klub prezidentining ishonchi va daldasini o‘yinchilar doimo xis qilishini, yaratib berilayotgan sharoitlarga javob tariqasida faqat g‘alaba qozonish lozimligini ma’lum qildi. «Albatta mavsumni ko‘tarinki ruhda o‘tkazib, bizga ishongan rahbariyat va muxlislarimizga munosib sovg‘a taqdim qilamiz», deya o‘z fikrlarini bildirdi jamoamiz sardori.

Jamoa ustozi Murod Otajonov ham yangi mavsumga tayyorgarlik haqida so‘z yuritar ekan, barchasi reja asosida olib borilgani, tarkib va o‘yin yetarlicha shakllantirilganini aytib o‘tdi. Murod Nodirovich jamoa yangi mavsumga tayyor ekanligini ta’kidlab, murabbiylar shtabi va futbolchilar rahbariyatning bildirgan ishonchini oqlash uchun astoydil mehnat qilishlarini ma’lum qildi.

Ta’kidlaganimizdek, tadbir yakunida yangi mavsum avvalida jamoamiz safiga kelib qo‘shilgan futbolchilar – Doniyor Abdumannopov, Shohruh Abdurahmonov, Amal Uvraimov, Ahmadjon Anvarov, legionerlar Igor Ivanovich, Aleksey Nosko, Viktor Sotnikauga yangi mavsum liboslari topshirildi. Demak, yangi «qaldirg‘ochlar» 2023 yilgi mavsumda quyidagi raqamlarda to‘p suradi:

Doniyor Abdumannopov – 33
Shohruh Abdurahmonov – 8
Amal Uvraimov – 21
Ahmadjon Anvarov – 14
Igor Ivanovich – 11
Aleksey Nosko – 2
Viktor Sotnikau – 17