Britaniyalik milliarder Jim Retkliff va qatarlik investorlar «Manchester Yunayted»ni sotib olishning 1-bosqichidan muvaffaqiyatli o‘tishdi, deb xabar bermoqda The Telegraph.

Manbaga ko‘ra, klubga egalik qiluvchi Gleyzerlar oilasi milliarder va Qatar shayxi Hamad bin Jassim bin Jobir Al Tani bilan kelishishga rozi bo‘ldi.

Bitim bo‘yicha vositachi bo‘lgan Raine Group ishtirokchilarga uchtalik bosqichning ikkinchisiga kirganliklarini ma’lum qildi. Ta’kidlanishicha, muzokaralar qat’iy maxfiylik sharoitida o‘tadi.

Shu bilan birga, potensial xaridorlar ikki haftadan ko‘proq vaqt oldin dastlabki takliflarni yuborganiga qaramay, aktivlar haqida batafsil moliyaviy ma’lumot olishmadi.

Oldinroq «Manchester Yunayted» vakillari ikki hafta ichida potensial xaridorlar bilan uchrashishi xabar qilingandi. Muzokaralar London va Manchesterda bo‘lib o‘tadi.

2022 yilning noyabrida 2005 yildan beri «Manchester Yunayted»ga egalik qilib kelayotgan Gleyzerlar oilasi klubni sotish niyati borligini malum qildi.