Британиялик миллиардер Жим Рэтклифф ва қатарлик инвесторлар «Манчестер Юнайтед»ни сотиб олишнинг 1-босқичидан муваффақиятли ўтишди, деб хабар бермоқда The Telegraph.

Манбага кўра, клубга эгалик қилувчи Глейзерлар оиласи миллиардер ва Қатар шайхи Ҳамад бин Жассим бин Жобир Ал Тани билан келишишга рози бўлди.

Битим бўйича воситачи бўлган Raine Group иштирокчиларга учталик босқичнинг иккинчисига кирганликларини маълум қилди. Таъкидланишича, музокаралар қатъий махфийлик шароитида ўтади.

Шу билан бирга, потенциал харидорлар икки ҳафтадан кўпроқ вақт олдин дастлабки таклифларни юборганига қарамай, активлар ҳақида батафсил молиявий маълумот олишмади.

Олдинроқ «Манчестер Юнайтед» вакиллари икки ҳафта ичида потенциал харидорлар билан учрашиши хабар қилинганди. Музокаралар Лондон ва Манчестерда бўлиб ўтади.

2022 йилнинг ноябрида 2005 йилдан бери «Манчестер Юнайтед»га эгалик қилиб келаётган Глейзерлар оиласи клубни сотиш нияти борлигини малум қилди.