Firminoning shartnomasi kelasi yozda tugaydi va klub bir necha bor shartnomani uzaytirishga urinib ko‘rdi. Roberto mersisaydliklar muvaffaqiyatining ajralmas qismi va har doim jamoaning muhim bo‘lagi bo‘lib kelgan. Nafaqat maydonda, balki undan tashqarida ham. Nemis jurnalisti Florian Plettenbergning yozishicha, futbolchi o‘zi uchun yakuniy qarorga kelgan - u shartnomani uzaytirmaydi va erkin agent sifatida "Liverpul"ni tark etadi.
Jurnalistning so‘zlariga ko‘ra, Yurgen Klopp Firminoni jamoada olib qolishni istagan. Nemis aslida niyatini yashirmadi va bu haqda matbuot anjumanlarida bir necha bor gapirdi. Fevral oyi boshida "qizillar"dan so‘nggi taklif bo‘ldi. Malum bo‘lishicha, futbolchi bilan tuzilgan yangi shartnoma muddati yana bir mavsumga uzaytirish imkoniyati bilan 2025 yilgacha amal qilishi kerak bo‘lgan.
Biroq, o‘z pozisiyasida raqobat kuchayganligi, shuningdek, turli omillar ta’sirida formani yo‘qotishi tufayli Firmino tarkibdagi o‘rnini yo‘qotdi. Endi u yoki bu ustunligi bilan, Jota, Darvin va Gakpo hujum markazida o‘z pozisiyasini da’vo qilmoqda. Agar 2018 yildan 2021 yilgacha Roberto bir mavsumda o‘rtacha 36 ta o‘yin o‘tkazgan bo‘lsa, so‘nggi mavsumda o‘tkazilgan o‘yinlar soni 20 taga kamaydi, joriy mavsumda esa 17 ta o‘yinda ishtirok etgan. Shubhasiz, braziliyalik futbolchi tez-tez maydonga tushishni istaydi va u bu haqda Yurgen Kloppga so‘nggi mashg‘ulotlardan biridan so‘ng uchrashuv chog‘ida aytdi.
"Qizillar" libosida Roberto 8 yil davomida 353 ta o‘yin o‘tkazdi, shuningdek, 7 ta kubokni qo‘lga kiritdi - Chempionlar ligasi va klublar o‘rtasidagi jahon chempionatidan tortib, Angliyadagi barcha mahalliy sovrinlargacha. 2015 yilning yozida u "Xoffenxaym"dan "Liverpul"ga o‘tganida, uning 8 yilini jamoada o‘tkazib, klubning so‘zsiz afsonasiga aylanishini hech kim tasavvur qila olmasdi.
Yurgen Kloppning tayinlanishi bilan braziliyalik futbolchi klubda yangi rolga ega bo‘ldi
Jamoadagi dastlabki oylar Firmino uchun omadli bo‘lmadi. "Qizillar" yaxshi holatda emas edi va oktyabr oyida bosh murabbiy Brendan Rojers ishdan bo‘shatildi. Uning o‘rniga Firminoni Bundesligadan beri tanigan Yurgen Klopp keldi.
Futbolchi Markus Gisdol qo‘l ostida "Xoffenxaym"da soxta to‘qqizlik pozisiyasida ishlatilgan. Nemis klubining o‘sha paytdagi murabbiyi futbolchining qobiliyatini tan oldi va uning kuchli tomonlariga mos keladigan yangi tarkib bilan tajriba o‘tkazishga qaror qildi. Jamoa odatda ikkita hujumchi bilan o‘ynadi, biroq Gisdol braziliyalikning harakati, ijodkorligi va mehnat darajasi ko‘p qirrali tarkibga ko‘proq mos kelishini his qildi.
Firminoning ish tezligi va pressing qobiliyati Kloppning yuqori pressing tizimi uchun juda muhim edi va uning texnik mahorati va qarashlari uni mukammal yolg‘on to‘qqizlikka aylantirdi. Robertoning harakati va jamoadoshlari bilan til topisha olish qobiliyati uni jamoadagi asosiy futbolchiga aylantiradi va ko‘pincha "Liverpul"ning boshqa hujumchilari, masalan, Muhammad Saloh va Sadio Mane uchun golli imkoniyatlar yaratdi.
Braziliyalik futbolchining soxta to‘qqizlikdagi roli "Liverpul"ning so‘nggi muvaffaqiyatlarida juda muhim bo‘ldi. Firminoni kuzatib, yana bir qancha jamoalar bu g‘oyani o‘zlari uchun qabul qilishdi. "Barselona" va "Manchester Siti" kabi Yevropaning bir qancha top klublari so‘nggi yillarda turli darajadagi muvaffaqiyatlar bilan yolg‘on to‘qqizlik futbolchilardan foydalangan.
Aynan Bobbi tufayli "Liverpul" uchligi muvaffaqiyatli ishladi va Saloh va Mane tez-tez gol urishdi. Braziliyalik futbolchi jamoadoshlariga qachon pressingni boshlash kerakligini ko‘rsatdi, chuqur ortga qaytardi, raqib himoyachilarini chalg‘itib sheriklariga joy yaratardi. Firmino, eng yaxshi holatda, o‘z rolida mukammal o‘yinchi edi.
"Liverpul"dagi faoliyati davomida u juda ko‘p maqtovlarga sazovor bo‘ldi, ammo "qizillar"ning sobiq futbolchisi Piter Krauch uning o‘yinini ajoyib ta’riflagan:
"U Premyer-ligadagi eng yaxshi soxta hujumchi. Saloh va Mane juda ko‘p gol urishadi, chunki ularda Firminodek jamoadosh bor. Yaqinda kimdir aytdi va bu menga juda yoqdi: "Agar sizga to‘p kelib tushsa bu Firminoning mehnati. Agar Robertoning maydondagi to‘psiz harakatlarini kuzatsangiz, buni sanat asari sifatida ko‘rasiz." Qisqacha aytganda, uning sharofati bilan "Liverpul"ning taktikasi ishlaydi."
Robertoda yetarli variantlar bo‘ladi
Firminoning "Liverpul" uchun qiymatini ortiqcha baholash qiyin. U so‘nggi yillarda jamoaning o‘yiniga katta hissa qo‘shdi, bu oddiy ko‘z bilan ko‘rinib turardi. Tabiiyki, hujumchining shartnomasi tugashi haqida hamma xabardor edi. Ko‘plab manfaatdor jamoalar bu imkoniyatdan foydalanib qolishni istaydi.
Braziliyalik futbolchiga asosiy da’vogarlardan biri "Inter" hisoblanadi. Italiya klubi Romelu Lukakuning "Chelsi"dan ijara muddati uzaytirilmasa, uning o‘rniga Firminoni sotib olmoqchi. Shu bilan birga, La Gazetta dello Sport hujumchining o‘zi ham transferdan manfaatdor ekanini ta’kidlaydi.
Hozir Bobbining maoshi 10 million yevro atrofida. Milanliklar bunday summani taklif qilishga tayyor emaslar, biroq ular futbolchini jamoaning eng ko‘p maosh oluvchi futbolchilaridan biriga aylantirishga qodir. Ommaviy axborot vositalarida yiliga 8 million yevro haqida ma’lumot paydo bo‘ldi va har ikki tomon ham bu mablag‘dan mamnun.
Hujumchiga yana bir davogar avvalroq Krishtianu Ronalduni sotib olgan arablarning "An-Nasr" klubidir. Firminoga kelsak, saudiyaliklar maoshini katta miqdorda oshirish bo‘yicha ularning foydali taklifi futbolchini kelasi yozda o‘z klubiga o‘tishga ishontirishiga umid qilishmoqda.
